Audisaun konjunta komisaun no Governu ba proposta OJE 2020 iha sala plenáriu, kuarta (24/09). Imajen Tatoli/Egas Cristovão

DILI, 23 setembru 2020 (TATOLI)-Orsamentu Jerál Estadu (OJE) 2020 ne’ebé seidauk entra ein vigór obriga Governu desde janeiru to’o agora tenke rekorre ba Dotasaun Orsamentál Tempoária (DOT) hodi bele sustenta mákina Estadu.

Ministru Finansa, Fernando Hanjam, hateten durante ezekusaun ho forma duodesimál, Governu sei iha balansu millaun $896,7 hosi totál proposta OJE 2020 ho montante biliaun $1,497.1.

“Ita haree hosi montante ezekusaun, konsidera katak sei iha millaun $896,7 hosi tetu respetiva proposta OJE 2020,  ne’ebé Governu kontinua kompromete atu ezekuta tantu ho forma duodesimál no ezekusaun normál hafoin orsamentu ne’e  tama ein vigór,” tenik Ministru Fernando, iha ámbitu audisaun komisaun konjunta Parlamentu Nasionál (PN) ho Governu, iha sala plenáriu, kuarta ne’e.

Notisia Revente: KM aprova tetu OJE 2020 biliaun $1,497, aumentu millaun $1,49

Despeza DOT to’o agostu 2020  atinje ona montante millaun $600,4 hosi totál tetu proposta.

“Orsamentu Jerál Estadu 2020 ho montante biliaun $1,497.1, Governu ezekuta ona ho forma duodedesimál no ezekusaun iha ámbitu surtu COVID-19 to’o loron 31 agostu 2020 ho valór totál millaun $600,4,” nia realsa.

Hosi montante ezekusaun, kompostu hosi ezekusaun reál iha nível kategoria orsamentál hanesan saláriu no vensimentu millaun $123,6,  bens no servisu millaun $199,7, tranferénsia públika millaun $153,7, kapitál menór millaun $2,2, no kapitál dezenvolvimentu millaun $120,8.

Tuir  Ministru Finansa katak orsamentu tinan ne’e ho montante billaun $1,497,1 bainhira distribui ba klasifikasaun ekonómika ka kategoria orsamentál maka saláriu no vensimentu millaun $206,7, bens no servisu millaun $496,7, tranferénsia públika millaun $578,7, kapitál menór millaun $8,9, kapitál dezenvolvimentu millaun $213,4.

Despeza OJE 2020 mai hosi millaun $973,9 hosi fundu petrolíferu, millaun $175 hosi reseita tributária, millaun $6,8 husi reseita própria, millaun $10,7 hosi doasaun, millaun $0,5 hosi jurus no millaun $214,2 hosi saldo tezoru, millaun $76 hosi saldo Rejiaun Adminsitrativu Espesiál Oé-cusse no Ambeno (RAEOA) no millaun $70 hosi empréstimu.

Governante ne’e dehan, durante períodu 01 setembru to’o 31 dezembru 2020, ho balansu ne’ebé sei iha no engloba iha proposta OJE 2020, Governu sei evetua pagamentu obrigasaun legál no kontratuál sira ne’ebé Estadu asume iha tinan ne’e hanesan, pagamentu sálariu no suplementu ba funsionáriu, ajente no trabaladór sira  iha administrasaun públika, pagamentu ba pensaun vitalísia, pensaun veteranu, pensaun idozu, invalidez no bolsa da mãe, no pagamentu ba rejime kontributivu segurasa sosiál.

Nune’e mós, pagamentu ba cesta bázika ba agregadu família sira no apoia manutesaun unidade rekuperasaun ekonómika, pagamentu ba manutesaun no fornesementu kombustível ba sentru elétrika iha Hera no Betanu, pagamentu ba fornesimentu médikamentu no ekipamentu médiku.

Sei halo mós pagamentu ba projetu manutesaun bee moos no saneamentu, pagamentu ba akizasaun bens no servisu ba mákina administrasaun públika, pagamentu ba projetu infraestutura sira inklui mós emprestimu no pagamentu medida prinsipál sira seluk.

Proposta lei OJE 2020 atu kobre nesesidade ba programa no prioridade nasionál ne’ebé VIII Governu Konstitusionál define ona, liuliu iha nível estabilizasaun setór sosiál no ekonómiku, inklui prosesu reforma institusionál hirak ne’ebé hala’o daudaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here