Diretór Jerál Servisu Operesionál no Protesaun Sivíl, Ismael da Costa Babo. Imajen Tatoli/Eugénio Pereira

DILI, 22 setembru 2020 (TATOLI)- Sekretáriu Estadu Protesaun Sivíl (SEPS) liuhusi Diresaun Jerál Servisu Operasionál no Protesaun Sivíl (SOPS) alerta ba populasaun iha territóriu nasionál e atu kuidadu aan no atensaun tanba sei akontese udan no anin-boot iha  períodu meiudia to’o kalan durante iha fim da semana ne’e.

Diretór Jerál Servisu Operasionál no Protesaun Sivíl (SOPS), Superintendente Asistente Polísia, Ismael da Costa Babo, informa, sira-nia part simu ona informasaun husi analiza Timor Leste MeteoClima.

Atu halo prevensaun ba ameasa husi dezastre naturál ne’e, pontu vokál SOPS tuun ona iha terrenu koordena ho autoridade sosializa ona informasaun prevensaun ba populasaun iha área remota.

“Informasaun ne’ebé Timor Leste MeteoClima fó sai ne’e hanesan avizu antesipada no alerta ida ba ita hotu, liu-liu komunidade sira iha área afetadu ne’ebé anin no udan sei boot, no ita hatún ona orientasaun ba pontu vokál sira iha munisípiu hodi transmite informasaun ba too iha baze,” dehan Diretór SOPS, Ismael Babo ba Agência Tatoli, ohin, iha Otél JL-Vila, Fatuhada, Dili.

Daudaun ne’e ekipa pontu vokál sira ne’ebé servisu iha Diresaun Jerál Dezastre Naturaís no Diresaun Protesaun Sivíl, Bombeiru, Diresaun Jerál Servisu Patrimóniu Públiku, Informasaun Konflitu Komunitáriu halo ona koordenasaun servisu ho autoridade.

Nia dehan, mezmu iklima Timor-Leste iha setembru 2020 sei kategoria bailoron, maibé udan no anin komesa akontese signifika mosu mudansa ba iklima hodi husu atensaun ba povu kuidadu no próteze aan bainhira mosu anin no udan.

Iha 2019 akontese mudansa iklima halo anin no udan-boot mosu iha territóriu Timor-Leste halo ema balun mate no povu nia uma barak hetan inundasaun no estragus no mosu inséndiu iha parte Ainaro, Bobonaro no foho Matebian nian.

Governu Timor-Leste mós kontinua servisu hamutuk ho parseiru dezenvolvimentu sira hanesan, Cruz Vermella de Timor-Leste (CVTL), Governu Austrália, JICA, COICA no organizasaun seluk tan, kria koordenasaun servisu hodi fó apoiu ai-han no materiál konstrusaun ba povu sira bainhira enfrenta problema.

Ismael Babo rekoñese agora daudaun estoke ba ai-han no materiál atu fó apoiu ba vítima dezastre sira mínimu tebes, tanba tinan kotuk aprezenta planu OJE 2019 sumba tiha iha Parlamentu Nasionál.

Area sira ne’ebé presiza tau atensaun espesiál atu kuidadu maka hanesan, Lolotoe, Zumalai, Hatu-Udo, Loti Same -Betano, Alas, Fatuberlihu, Dilor, Soibada, Barique, Venilale, Baguia, Quelikai, Hatulia, Gleno, Atabae, Tutuala, Lospalos, Ilomar, Ossu, Dili  no Liquiça.

Governu husu ba komunidade tomak atu evita zonas ba risku ba inundasaun (bee sa’e) atu nune’e labele hamosu risku ba ema ida-idak nian vida.

Tuir previzaun ba fim da semana ne’e, anin sei huu ho diresaun variavel no bele sustenta to’o 45 km/h liu-liu iha parte Sentrál Timor-Leste nian durante iha periodu meiu dia to’o loraik.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here