DILI, 22 setembru 2020 (TATOLI)- Diretór Jerál Servisu Operasionál no Protesaun Sivíl (SOPS), Superintendente Asistente Polísia, Ismael da Costa Babo, informa, korpu Bombeiru presiza tebes governu nian tulun atu sosa tan ekipamentu no transporte ne’ebé di’ak atu apoiu servisu Bombeiru nian hodi responde inséndiu ho grau boot.
Notísia Relevante : 2019, Bombeiru Dili Halo Intervensaun ba Dezastre Ahi Han Uma 89
Superintendente Asistente Ismael Babo rekoñese problema inséndiu ne’ebé akontese foin lalais iha armazein Kompañia Foho Osan Mean no Cahaya iha área Bebonuk, Dili, halo ekipa Bombeiru hamate ahi lori tempu oras 24, tanba ekipamentu protesaun ladún sufisiente.
Misaun Bombeiru ne’e importante atu fó garantia ba prestasaun no seguransa ba sidadaun hotu nia vida no sira nia sasán. Hamate ahi ne’ebé han uma, ai-laran ka floresta, indústria no fó mós asisténsia ba asidente rodoviáriu no halo mós salvamentu iha área rurais, sidade laran, industriais, no fó apoiu ba komunidade ne’ebé hasoru dezastre naturaís presiza tebes ekipamentu servisu ne’ebé modernu no kualidade.
“Ami aprezenta ona ba governu liu-liu atu tau atensaun ba ekipamentu ba Bombeiru,” informa Ismael Babo, ohin, ba Agência Tatoli iha Otél JL-Vila, Fatuhada, Dili.
Foin lalais ne’e, ekipa Bombeiru rasik halo ona ekontru Vise Ministru Interiór António Armindo, Sekretáriu Estadu Protesaun Sivíl, Joaquim José Gusmão dos Reis Martins, hodi halo aprezentasaun Orsamentu Programativa Ministériu Interior nian tinan fiskál 2021 ba hamutuk ho pontu fokál ne’ebé responsavel ba área planeamentu no orsamentu nian hodi propoin halo justifikasaun ba razaun atu tau osan adisionál ne’ebé aprezenta ba ekipa Komité Revizaun Orsamentu Polítika (KROP).
Ho problema ne’ebé korpu Bombeiru enfrenta, sira-nia parte mós aprezenta ona proposta ba Sekretáriu Estadu Protesaun Sivíl hodi aprezenta ba Ministru Interiór nu’udar mós Primeiru-Ministru, Taur Matan Ruak, atu tau konsiderasaun.
OJE 2021 nian ne’ebé Ministériu Interiór aprezenta ba ezekusaun no finansiamentu ba prioridade liu-liu aliñamentu programa no orsamentasaun inklui pontu konkluzaun antes lori ba halo aprezentasaun iha ekipa KROP hamutuk millaun $13 no fahe ba protesaun sivíl nian iha millaun $9-liu no sira prevee tan ba orsamentu adisionál millaun $5 atu sosa karreta espesífiku ba Bombeiru no seluk tan.
Antes ne’e, Primeiru-Ministru Taur Matan Ruak, dehan, sira-nia parte sei haree orsamentu ne’e bele hetan apresiasaun no konsiderasaun finál ba OJE 2021, hodi define programa prioridade tuir polítika VIII Governu Konstitusionál.
Jornalista : Eugénio Pereira
Editór : Francisco Simões
