Kondisaun komunidade nia uma ne'ebé hela besik mota ninin Bidau hetan estragu inundasaun, 13 marsu 2020. Imajen Tatoli/António Gonçalves

DILI, 21 setembru 2020 (TATOLI)-Iha loron dahuluk reuniaun Komité Revizaun Orsamentu Polítiku (KROP) ba proposta Orsamentu Jerál Estadu (OJE) 2021, Sekretaria Estadu Protesaun Sivíl (SEPS) husu adisionál besik millaun $2, hosi tetu inisiál $300.000.

Tuir Sekretáriu Estadu Protesaun Sivíl, Joaquim José dos Gusmão Reis Martins, orsamentu ba Sekretaria Estadu ne’e akumula hotu iha Ministériu Interior (MI), tanba tutela ba ministériu ne’e no ba orsamentu tinan oin hakarak toma atensaun ba diresaun nasionál risku no dezastre ne’ebé maka sempre fó asisténsia ba dezastre naturál hanesan inundasaun, ahi han uma, no seluk tan.

“Orsamentu ne’ebé ami tau iha 2021 hamutuk $300.000-resin, ne’ebé ami tenke husu tan adisionál besik millaun $2 tanba haree ba esperiénsia iha tinan ne’e iha dezastre barak akontese, tanba ne’e presiza orsamentu boot oitoan atu apoiu vítima, liuliu hahan no la’ós hahan, hafoin apoia rekuperasaun hodi bele ajuda sira harii fali uma,” relata  Sekretáriu Estadu Joaquim José, hafoin partisipa iha diskusaun KROP, ne’ebé realiza iha salaun Ministériu Finansa (MF), Aitarak-laran, segunda ne’e.

Sekretáriu Estadu ba Protesaun Sivíl, Joaquim José Gusmão dos Reis Martins. Imajen Tatoli/Egas Cristovão

Aleinde ne’e, SEPS planea sosa veíkulu espesiál rua no tangki tau bee hodi antisipa mosu inséndiu ka ahi-han iha Kosta Súl.

Sekretáriu Estadu ne’e mós presiza reforsa serbisu bombeiru iha parte viatura no bee atu kombate inséndiu ho lalais.

“Presiza ekipamentu bombeiru ne’ebé adekuadu no mós ekipamentu protesaun ba téknika bombeiru sira, tanba durante ne’e sira halo atuasaun ba insendiu mós dalaruma sira la uza máskara. Ita sorte tanba ajuda maka’as hosi setór privadu sira kombate inséndiu,” nia akresenta.

Governante ne’e nota katak, haree ba evolusaun iha kapital Dili ne’ebé maka iha armajen boot barak, maka presiza iha viatura ne’ebé maka bele responde situasaun urjénsia.

Nune’e mós, SEPD husu konsiderasaun KROP atubele autoriza sosa viatura iha tinan 2021.

“Iha postu administrativu Suai, munisípiu Covalima, kompaña Timor Resources komesa halo ona perfurasaun mina iha rai-maran, ita laiha ekipamentu adekuadu hodi garantia ba sira-nia investimentu. Tanba ne’e presiza viatura hodi bele fó garantia, ita gasta osan oituan sosa viatura sira no fó treinu ba ita-nia pesoál sira,” nia dehan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here