Turizmu doméstiku, bee-manas Marobo. Imajen Tatoli/António Gonçalves

DILI, 18 setembru 2020 (TATOLI)-Governu liuhosi Ministériu Komérsiu no Indústria (MTKI) ho parseria ho United States Agency for International Development (USAID) liuhosi Tourism For All Project no empreza turizmu sei hala’o kampaña promosaun turizmu doméstiku, ne’ebé sei hahú iha loron 27 setembru to’o 31 dezembru 2020.

“Kampaña ne’e ho objetivu atu inspira ita hotu atu suporta empreza turizmu hodi sai turista iha ita-nia rai rasik,” tenik Diretór Jerál Turizmu MTKI, José Filipe Dias Quintas, liuhosi konferénsia impresa iha Sentru Informasaun Turístika, iha Lecidere, sesta ne’e.

Kampaña ho tema “Ha’u-nia Timor-Leste” ho intensaun enkoraja ema hotu atu iha esperiénsia aventura no atrasaun, hahú konsumu ai-han iha restaurante favóritu, vizita munisípiu, luku-tasi, koko kafé Timór nia sabór, no seluk tan.

Diretór Jerál ne’e husu ema hotu atubele hatudu solidaridade liuhosi fahe foto esperiénsia, pontu beleza, fatin kulturál no istóriku, animál-fuik, uza hashtag #HauNiaTimorLeste no #ExploreTheUndiscovered, bainhira fahe foto hirak ne’e iha rede sosiál no ajuda fahe tutan mensajen hirak ne’e ba família no kolega sira hotu.

Daudaun ne’e, empreza turizmu barak mak iha situasaun difísil nia-laran maibé Governu sei suporta halo diferénsa no ajuda sira ultrapasa krize iha COVID-19  to’o Timor-Leste loke-an ba simu turista internasionál sira.

Timor-Leste ninia kampaña destination marketing internasionál kontinua ho marka “Explore The Undiscovered” no hateke ba oin atu simu turista internasionál bainhira situasaun ne’e fila hikas ba normál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here