Diretór Jerál Turizmu Ministériu Turizmu MTK , José Filipe Dias Quintas, hamutuk ho parseiru no setór privadu halo konferénsia imprensa, iha Sentru Informasaun Turístika, Lecidere, kinta (18/09). Imajen Tatoli/Florêncio Miranda Ximenes

DILI, 18 setembru 2020 (TATOLI)-Iha loron 27 setembru nasaun tomak komemora loron mundiál turizmu, ne’ebé iha tinan ne’e Organizasaun Mundiál Turizmu deside foti tema “harii pás no hasa’e koñesementu.

Iha Timor-Leste, Governu liuhosi Ministériu Komérsiu no Indústria (MTKI) no parseiru dezenvolvimentu nasionál no internasionál inklui setór privadu atu komemora loron mundiál ne’e ho sub-tema: “mai ita dezenvolve no promove ita-nia turizmu rai-laran”.

Razaun fundamental MTKI hili sub-tema ne’e, tanba iha situasaun COVID-19 indústria turizmu mundiál afetadu boot no impede ba movimentu ema iha mundu rai-klaran, tanba ne’e komemorasaun tinan ne’e foka liu ba turizmu doméstiku.

“Iha ámbitu komemorasaun loron mundiál turizmu, ita atu promove turizmu doméstika iha ita-nia rai-laran tanba VIII Governu Konstitusionál iha polítika ida atu foka liu ba turizmu doméstiku iha kurtu prazu,” tenik Diretór Jerál Turizmu MTKI, José Filipe Dias Quintas, liuhosi konferénsia impresa iha Sentru Informasaun Turístika, iha Lecidere, sesta ne’e.

Iha ámbitu komemosasun ne’e, MTKI sei serbisu hamutuk ho USAID’s Tourism For All Project, asosiasaun turizmu no empreza turizmu sira sei organiza eventu espozisaun turizmu ‘Feira Ha’u-nia Timor-Leste’, limpeza jerál iha área kosteira, semináriu mata-dalan turizmu komunitáriu no dezenvolve no promove turizmu doméstiku hahú hosi loron 22  to’o 26 setembru.

“Eventu ne’e hanesan oportunidade ida atu hatene kona-ba Timor-Leste ninia animal-fuik, riku-soin tasi-okos, atividades kulturál no atrasaun turístiku sira iha munisípiu 12 inklui Rejiaun Administrativu Espesiál Oé-cusse Ambeno,” nia subliña.

Tanba ne’e, Diretór Jerál ne’e kovida publiku sira atu partisipa iha eventu komemorasaun ne’e tanba sei loke ba públiku atu hamutuk kontribui, dezenvolve no promove turizmu doméstiku iha Timor-Leste.

“Ita hamutuk atu promove ita-nia turizmu rai-laran hodi atrai ita-nia maluk iha Dili atu bá munisípiu sira ne’ebé iha fatin sítiu turístiku sira hodi Governu mós bele investe maka’as liután ba infraestutura sítiu turístiku sira,” nia informa.

MTKI sei realiza mós semináriu kona-ba mata-dalan turizmu komunitáriu atubele kontribui idea hodi bele kompleta esbosu molok finaliza no sei aprezenta ba Konsellu Ministru hodi hetan aprovasaun no sai mata-dalan ba dezenvolvimentu turizmu komunitáriu iha Timor-Leste.

Iha ámbitu COVID-19, MTKI serbisu hamutuk ho parte interesada sira hodi dezenvolve no promove turizmu rai-laran hodi enkoraja ema lokál no estranjeiru atubele vizita sítiu turístiku sira iha nível munísipiu, postu administrativu, suku no aldeia.

Patrosinadór sira ba eventu ne’e maka hanesan MTKI, USAID, Asosiasaun Hotelaria Timor-Leste, Timor Plaza, Phone House, TL Sport, CeMill Group, East Timor Trading Group, Yellow Tail, Bintang, Telkomcel, Timor Telecom, Hotel Timor, Air Timor, Pelican Paradise, ANZ, Telemor, no Hotel Novo Turismo.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here