Promosaun Telkomcel iha ámbitu aniversáriu daualu. Imajen/Telkomcel

DILI, 18 setembru 2020 (TATOLI)–Iha ámbitu komemorasaun aniversáriu Telkomcel ba daualu iha 17 setembru, operadór telekomunikasaun hakarak fó apresiasaun ba kliente sira liuhosi promosaun no eventu oioin ne’ebé sei realiza iha fulan-setembru nia-laran.

Marketing Communication Manager Telkomcel, Maria Pade, informa durante fulan-ida nia-laran sei iha xamada gratuita entre kliente ho númeru Telkomcel iha Timór laran tomak.  

“Promosaun ne’ebé ami oferese maka xamada gratutita (free call) entre númeru ativu Telkomcel  Timor-Leste iha rai-laran, ne’ebé sei aplika hahú iha loron 01 to’o 30 setembru 2020, laiha prosesu ativasaun promosaun no kritériu saldo mínimu,” dehan Maria Pade, liuhosi konferénsia imprensa ‘Ola Jornalista’, iha Timor Plaza, sesta ne’e.

Aleinde ne’e, kliente sira hetan promosaun diskontu porsentu 25 ba voucher PUBG Mobile 60 unknown cash (UC), 325 UC, no 660 UC no diskontu ne’e sei válidu bainhira kliente sosa voucher PUBG liuhosi website http://games.tl ka app Mytelkomcel, ne’ebé válidu ba sosa dahuluk no dala ida de’it kada loron.

“Promosaun ne’e sei hahú iha loron 15 setembru no ramata ona iha loron aniversáriu Telkomcel iha 17 setembru,” nia akresenta.

Telkomcel mós hala’o eventu iha munisípiu sira atu festeza ho kliente Telcomcel iha.

“Ami halo eventu bazar Telkomcel kada semana iha munisípiu 12 tanba ami hakarak iha ezisténsia tinan ualu ne’e festa la’ós iha Dili de’it, maibé kliente sira iha munisípiu mós bele sente hotu aniversáriu Telkomcel no hosi ne’e ami mós apresia kliente hotu liuhosi prémiu, prezente no bonus oioin iha bazar ne’e,” esplika jerente ne’e.

Operadór Telekomunikasaun ne’e kria mós grupu hanaran Beach Clean Up Telkomcel, ne’ebé envolve funsionáriu Telkomcel hotu iha Dili hala’o limpreza iha loron 11 setembru 2020.

“Esprera liuhosi atividade ne’e bele fó benefísiu ba povu Timor-Leste hotu,” nia dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here