Arguidu Jery Gabes Bunao, nu’udar sidadaun Filipina. Imajen Tatoli/António Gonçalves

DILI, 17 setembru 2020 (TATOLI)-Juiz kultiva Tribunál Distritál Dili, ohin, foti desizaun finál hodi kondena arguidu Jery Gabes Bunao, nu’udar sidadaun Filipina ho pena prizaun efetivu tinan-10 tanba provadu komete krime tráfiku ilísitu droga iha Timor-Leste.

Notísia Relevante : Kazu droga, MP alega pena prizaun tinan-15 ba arguidu JGB

Sirkunstánsia husi kazu droga ne’e  sei iha relasaun ho kazál Timor-oan ne’ebé oras ne’e sai kondenadu iha Tribunál  Atambua, Indonézia, ne’ebé autoridade Indonézia nian kaptura iha fronteira terrestre Motain,  Timor Osidentál.

Kazál Timor-oan ne’e autoridade sira kaptura tanba lori  Pill Ecstasy sai husi territóriu Timor-Leste ba Timor Osidentál liuhusi Motain iha tinan 2019.

Liuhusi leitura, Juiza  Zulmira Auxiliadora hateten, produsaun prova iha julgamentu  mezmu arguidu hili ho dalan nonook no ko’alia  de’it iha julgamentu   primeiru interrogatóriu junta mós ho deklarasaun testemuña no auto  ne’ebé aprezenta husi Ministériu Públiku (MP)  iha duni faktu provadu balun mak hanesan arguidu   simu sasán droga husi ema Afrikanu ida husi Nijeria transforma sasán sira-ne’e husi estranjeiru ho nia destinasaun maka Indonézia. Maibé sasán ilísitu sira-ne’e tenke tama lai mai territóriu Timor liuhusi arguidu nia kompañia internasionál JVK, hafoin maka arguidu haruka fali ba Indonézia liuhusi Kupang.

Arguidu simu sasán hanesan husi sidadaun Nijéria nian  ne’e ba dala tolu ona  no ba dala ikus maka haruka kazál Timor-oan mak lori sai husi Motain, Indonézia, ne’ebé daudaun ne’e hetan kondenasaun husi Tribunál Indonézia.

Faktu  mós provadu arguidu haruka kazál Timor-oan  lori kuantidade Pill Ecstasy ho totál musan 4.874, ne’ebé tau iha mákina imprime  ho marka EPSON, ne’ebé lori sai husi territóriu Timor-Leste, liuhusi Motain iha área jurizdisaun Timor-Leste nian.

Faktu provadu mós katak, tuir faktu ne’ebé arrola husi Ministériu Públiku (MP) katak, iha loron 29  maiu 2019, Polísia Investigasaun Nasionál nian simu, informasaun (via WhatsApp) husi Polísia Repúblika Indonézia (POLRI) iha Atambua, Motain, iha loron ne’ebá katak, POLRI detein ona kazál Timor-oan iha Motain, ne’ebé mak pertensia ba territóriu Indonézia nian, tanba lori droga ho tipu Ecstasy.

Bainhira Polísia Indonézia halo detensaun no pasa revista ba kazál Timor-oan ne’e, iha  inkéritu  ba kazál Timor-oan ne’e deklara katak arguidu  maka haruka sira na’in-rua lori mákina imprime (tau droga iha laran) ne’e ba Indonézia, maibé kazál Timor-oan ne’e la hatene pill ecstasy iha mákina imprime nia laran.

Juiza Zulmira Auxiliadora hateten, mezmu iha julgamentu primeiru interrogatóriu no deklarasaun eskrita ne’ebé arguidu deklara katak, sasán sira  hanesan iha  mákina  imprime nia parte simu no  transporta tutan de’it  no la droga iha laran.

Juiza ne’e  hatutan, sasán ne’ebé ki’ik haruka ho destinasaun to’o Timor-Leste maka haruka sai fali, no arguidu fasilita hodi transporta sai fali hodi  hetan mós vantajen osan nominal husi ema ne’ebé haruka mai.

Ho aktu sira ne’e hotu Tribunál konsidera arguidu halo ho forma livre, de liberada no konsentimentu hatene momoos katak, simu husi ema seluk (rede internasionál), rai no haruka ka transfere sasán ilísitu (droga) atu nune’e arguidu bele hetan vantajen husi hahalok ilísitu ne’e.

Arguidu mós hatene hela katak, hahalok ka konduta ne’ebé maka nia halo proibidu tuir lei penál Timor-Leste nian.

Tribunál kondena arguidu hanesan autoria materiál ba prátika krime tráfiku no atividade ilísitu iha artigu 7 númeru 1, tanba ne’e tuir entendimentu Tribunál haree ba sirkunstánsia hotu ba krime ne’e ho nia moldura penal ne’ebé iha deside kondena arguidu ho pena prizaun efetivu tinan-10.

Tribunál entende hodi fó pena expulsaun bainhira arguidu kumpre ona pena sei haruka (deporta) fila arguidu ba nia-rain Filipina  durante tinan-ualu sei la tama fila-fali iha territóriu Timor-Leste.

Haree ba kondisaun ekonomia arguidu nian Tribunál aplika mós kustu judisiáriu ba arguidu selu ho kustu $50.00.

Ikus liu Tribunál mós absolve arguidu husi krime Asosiasaun Kriminoza iha artigu 10 númeru 1, ne’ebé antes  Ministériu Públiku imputa ba arguidu, tanba Tribunál konsidera arguidu simu de’it objetu material husi ema seluk hodi haruka tutan no  la’ós iha nia    liman laran tanba ne’e la prienxe rekizitu kriminál.

Audiénsia julgamentu ne’e,  Ministériu Públiku reprezenta husi prokuradór Luis Hernánio Rangel, arguidu hetan asisténsia legál hosi advogadu privadu Domingos Pinto, José Andrade ho Agostinho de Jesus.

Jornalista   : Nelson de Sousa

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here