Primeiru-Ministru, Taur Matan Ruak. akompaña hosi Prokuradór Jerál Repúblika, José da Costa Ximenes no ekipa, asina “livro de honra”, iha edifíisiu PGR, Colmera, kinta (17/09). Imajen Tatoli/Egas Cristovão

DILI, 17 setembru 2020 (TATOLI)-Ministériu Públiku (MP) selebra aniversáriu ba dala-20 iha loron 06 juñu liubá, maibé ho situasaun pandemia COVID-19 maka labele realiza no deside sei selebra iha loron 18 outubru tinan ne’e.

Iha ámbitu selebrasaun aniversáriu ba instituisaun Estadu ne’e maka Prokuradoria Jerál Repúblika (PGR, sigla portugés) halo atividade balun no konvida líder nasionál inklui sosiedade sivíl hodi hala’o vizita ofisiál hodi haree besik serbisu durante ezisténsia.

“Selebra aniversáriu ne’e maka ami organiza atividade ida hodi konvida líder nasionál sira kompostu hosi eis Prezidente Repúblika no eis Primeiru-Ministru sira, inklui sosiedade sivíl atu mai vizita PGR,” relata Prokuradór Jéral Repúblika, José Ximenes hafoin simu vizita Primeiru-Ministru, Taur Matan Ruak iha edifísiu Colmera, kinta ne’e.

Prokurador Jerál Repúblika, José da Costa Ximenes. Imajen Tatoli/Egas Cristovão

Relasiona ho atividade ne’e maka iha loron 03 juñu 2019 eis Prezidente Repúblika, Xanana Gusmão vizita uluk no iha 21 juñu 2019 eis Prezidente Repúblika, José Ramos Horta vizita ona edifísiu PGR, nune’e mós eis Primeiru-Ministru, Marí Alkatiri no sosiedade sivíl sira.

Ho prezensa PM Taur nian maka termina ona vizita hosi líder nasionál sira.

“Vizita hotu mai ho objetivu atu komemora aniversáriu konstrusaun Ministériu Públiku hodi hatudu ba sira oinsá funsionamentu instituisaun ne’e desde harii. Vizita hosi sosiedade sivíl mós importante tanba dalaruma sira halo krítika no hanoin krítiku hamutuk hodi dezenvolve instituisaun,” Prokuradór Jerál ne’e akresenta.

Durante vizita ne’e, Xefe Governu husu ba MP atu kontinua dezenvolve no reforsa-an atubele atende di’ak liután komunidade.

Primeiru-Ministru, Taur Matan Ruak, halo vizita ba edifísiu PGR, Colmera, kinta (17/09). Imajen Tatoli/Egas Cristovão

“Primeiru-Ministru husu fasilita asesu ba justisa no apresia servisu instituisaun ne’ebé la imajina katak kompleta ona tinan 20. Husu mós kontinua prepara-an ba dezafíu oioin iha futuru bainhira ko’alia kona-ba kombate kriminalidade iha nível nasionál,” nia haktuir.

Iha vizita ne’e, eis Prezidente Repúblika ne’e asina mós “livro de honra”, ne’ebé maka MP prepara hodi hakerek hamutuk mensajen saida de’it mak líder nasionál hanoin hodi dezenvolve instituisaun ho di’ak.

Jornalista: Antónia Gusmão

Editora: Julia Chatarina 

HAKEREK NO HATÁN

Please enter your comment!
Please enter your name here