Primeiru-Ministru, Taur Matan Ruak. Imajen Tatoli/Egas Cristovão

DILI, 17 setembru 2020 (TATOLI)-VIII Governu Konstitusionál seidauk simu  karta notifikasaun ruma hosi Banku Federál Amérika kona-ba labele halo likidez osan bainhira iha pedidu levantamentu orsamentu hosi Governu, maski iha ona autorizasaun hosi Parlamentu Nasionál (PN).

“Ha’u seidauk simu surat ida no Parlamentu Nasionál mós seidauk aprova ita-nia Orsamentu Jerál Estadu (OJE) 2020, maibé ha’u hanoin ne’e laiha problema maski daudaun ne’e ita uza orsamentu doudesimál no dalaruma ita osan laiha ba husu, halo levatamentu, no tranférensia ho di’ak hela,” tenik Primeiru Ministru, Taur Matan Ruak, hafoin enkontru semanál ho Prezidente Repúblika, Francisco Guterres ‘Lú Olo’ iha Palásiu Prezidensiál, Bairro Pité, kinta ne’e.

Xefe Governu ko’alia lia hirak ne’e relasiona ho informasaun ne’ebé sirkula iha públiku nia le’et katak maski Governu no PN autoriza no aprova ona OJE, maibé Banku Federál Amérika sei la halo tranferénsia tanba Governu presiza prienxe prosedimentu.

Antes ne’e, Governadór Banco Central Timor-Leste (BCTL), Abrãao de Vasconselhos, hateten prosedimentu transferénsia fundu petróleu ba konta Estadu estabalese ona iha Lei númeru 9/2005 03 agostu kona-ba Lei Fundu Petróleu, ne’ebé bazeia ba artigu 139 Konstituisaun, mensiona katak petrolíferu hanesan propriedade Estadu.

Tanba ne’e, transferénsia bele realiza ho autorizasun PN atu Governu bele utiliza osan hosi fundu petróleu.

BCTL hanesan jestór operasionál ne’ebé iha kompeténsia ba jestaun jerál ba fundu no Ministériu Finansa reprezenta Governu no reprezenta tomak ba fundu ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here