Ministru Koodenadór Asuntu Ekonómiku, Joaquim Amaral asiste atribusaun deklarasaun benefísiu ba empreza sira iha salaun Ministériu Finansa, Aitarak-laran, kinta (17/09). Imajen Tatoli/António Gonçalves

DILI, 17 setembru 2020 (TATOLI)-Governu reprezenta hosi Ministériu Koordenadór Asuntu Ekonómiku (MKAE) no Ministériu Finansa (MF) emite deklarasaun benefísiu ba investidór nasionál no internasionál lima, ne’ebé investe iha setór produtivu no kontribui polítika planu rekuperasaun ekonómika Governu.

 Ministru Koodenadór Asuntu Ekonómiku, Joaquim Amaral, apresia investidór sira tanba maski iha situasaun COVID-19 nia laran ne’ebé iha implikasaun ba ekonomia todan tebes maibé hatudu nafatin kompromisu hodi halo investimentu iha rai-laran.

“Ha’u fó parabéns ba investidór na’in-lima, tanba VIII Governu introdús ona polítika planu rekuperasaun ekonomia ho objetivu atu tulun empreza sira hahú filafali atividade ekonomia, nune’e mós ba traballadór sira. Atividade sira ne’e foku maka’as atu konsentra ajuda setór privadu hasa’e kresimentu ekonómiku rai-laran atu mantein empregu no trava dezempregu,” tenik Ministru Joaquim bainhira entrga deklarasaun benefísiu ba investidór na’in-lima iha salaun auditorium Mistériu Finansa, Aitarak-laran, kinta ne’e.

Ambiente atribusaun deklarasaun benefísiu ba empreza sira iha salaun Ministériu Finansa, Aitarak-laran, kinta (17/09). Imajen Tatoli/António Gonçalves

Investidór na’in-lima, kompostu hosi empreza nasionál na’in-tolu no internasionál na’in-rua, iha área agarikultura, pekuária, turizmu, no industria transformadora.

Empreza Comve Lda halo investimentu hakiak manu lokaliza iha postu administrativu Lospalos munisípiu Lautém, empreza Acelda Unipesoal Lda investe produsaun hare lokaliza iha postu administrativu Vemasse munisípiu Baucau, empreza Dos Santos Unipesioal Lda investe iha produsaun hare lokaliza iha postu administrativu Atabae munisípiu Bobonaro, empreza Compas Charter and Diverses Unipesoal Lda  investre iha área turizmu lokaliza iha Atauro, no empreza Agropa Corporation Lda kona-ba kuda ai-fuan naga lokaliza iha postu administrativu Maubara munisípiu Liquiçá.

Governante ne’e agradese mós Ajénsia Investimentu no Promosaun ba Esportasaun (Tradeinvest, sigla inglés) tanba bele fasilita nafatin investidór sira.

“Marka istória boot tanba fó mensajen transmite sinál rekuperasaun ekonómika no reziliénsia ekonomia, tanba iha situasaun ne’e merkadu presiza tebes asaun konkreta atubele hatudu katak Timor-Leste nia ekonomia book-an daudauk hosi faze difísil nian,” nia akresenta.

Ministru apresia tanba investidór sira bele investe iha setór produtivu ne’ebé sai prioridade tebes ba Governu ne’ebé hanesan setór rekomendasaun hosi Komisaun Rekuperasaun Ekonómika, ne’ebé husu atu investe barak hodi bele dezenvolve ekonomia rai-laran.

“Estadu orgullu tanba ita bo’ot sira mai iha momentu oportunu atu hamutuk ho Estadu transmite informasaun ba merkadu katak ita-nia ekonomia rekopera daudaun no reziliénte duni,” nia dehan.

Iha biban ne’e, ezekutivu ne’e enkoraja investidór seluk atubele partisipa iha prosesu dezenvolvimentu ekonómiku.

“Lori Governu nia naran hakarak enkoraja investidór seluk atubele banati tuir investidór na’in-lima ne’ebé kontinua hola parte iha prosesu dezenvolvimentu, liuliu iha setór produtivu atu nune’e Governu mós kontinua seriamente serbisu hadi’a ambiente negósiu ne’ebé iha, liuliu ajénsia sira hanesan Tradeinvest, SERVE no seluk hanesan instituisaun emprezárial sira ne’ebé hanesan Governu nia mahon.

“Governu konsidera setór privadu hanesan parseria importante ida atu hamutuk halo serbisu maka’as iha faze rekuperasaun ekomómika atu ita bele hakat lalais liu faze importante ne’e to’o dezembru 2020 no bele loke dalan faze dezenvolvimentu ne’ebé hahú iha 2021,” nia subliña.

Diretór Ezekutivu Tradeinvest, Arcanjo da Silva, hateten iha faze inísiu ne’e entrega deklarasaun benefísiu ba investidór sira iha setór proditivu.

“Ita kontente tanba investidór na’in-lima ne’e iha setór produtivu tuir programa no polítika VIII Governu Konstituisionál, ne’ebé aposta dezenvolvimentu iha setór privadu no promove investimentu iha setór produtivu.

Nune’e, Tradeinvest iha esperansa iha tinan 2021 ho supervizaun MKAE bele promove industria iha transformadora balun tan atu beledudu investimentu iha rai-laran.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here