Partisipante iha Semináriu Nasionál “Asesilidade fíziku iha dezenvolvimentu nasional hodi garante la iha ema ida hela iha kotuk Timor-Leste”, iha maubara room, Timor Plaza, kinta (17/09). Imajen Tatoli/Egas Cristovão

DILI, 17 setembru 2020 (TATOLI)-Diretór Ezekutivu Asosiasaun Difisiente Timor-Leste (ADTL), Cesário da Silva, observa durante dezenvolvimentu nasionál liga ho asesibilidade fízika ladun fó fatin ba ema ho difisiénsia tanba ne’e grupu ne’e sente iha diskriminasaun.

“Ami-nia observasaun ba dezenvolvimentu nasionál liga ho asesibilidade fizíka, ami konsidera iha diskriminasaun tanba ita esklui ema ho difisiénsia. Ami dehan tanba asesibilidade fízika hanesan estrada no edifísiu públiku sira hotu la asesível ba ema ho difisiénsia, signifka ita esklui nafatin ema ho difisiénsia,” dehan Diretór Ezekutivu ADTL, maubara room iha Timor Plaza, kinta ne’e.

ADTL realiza semináriu ho tema: “Asesibilidade fíziku iha dezenvolvimentu nasionál hodi garantia laiha ema ida hela iha kotuk iha Timor-Leste”.

Diretór Ezekutivu ADTL, Cesário da Silva. ImajenTatoli/Egas Cristovão

Tuir Cesário da Silva, durante ne’e ema ho difisiénsia bainhira atu ba partisipa seremónia ruma karik labele tanba kauza hosi kondisaun no ambiente ne’e rasik la fó espasu ba ema ho difisiénsia.

“Ida-ne’e parte hosi áktu deskriminasaun no izolasaun ba ema ho difiénsia. Ho situasaun ne’e maka ami organiza semináriu ne’e,” nia akresenta.

Semináriu ne’e ho nia objetivu atu bolu hamutuk entidade hotu mai partisipa, nune’e bele propoinsolusaun ida ba dezenvolvimentu inkluzivu no asesível loloos iha prosesu dezenvolvimentu nasionál Timor-Leste nian.

Rekomenda ba Governu-PN opta asesibilidade universál

Parte ADTL nia rekomendasaun espesiál ba Governu no Parlamentu Nasionál liuhosi semináriu ne’e maka asesibilidade ba ema ho difisiénsia iha prosesu dezenvolvimentu nasionál Timor-Leste no tenke opta asesibilidade universál.

Asesibilidade fíziku iha fatin públiku. Imajen/arquiteta

“Ami-nia rekomendasaun primeiru ita ko’alia kona-ba asesibilidade tenke opta dezeñu universál ne’ebé Organizasaun Nasaun Unida lansa ona. Tanba ne’e, nu’udar mata-dalan ne’ebé di’ak ba prosesu konstrusaun ne’ebé sensível no asesível ba ema ho difisiénsia,” nia subliña.

Aleinde ne’e, asosiasaun ne’e fó mós rekomendasaun espesiál ba PN atu halo fiskalizasaun ba konstrusaun sira, kona-ba prosesu kontrusaun no garantia asesibilidade ba ema hotu.

“Ami hakarak rekomenda prosesu dezenvolvimentu nasionál tenke asesível no tenke inkluzivu ba asuntu difisiénsia iha Timor-Leste,” nia afirma.

Iha fatin hanesan  Prezidente Komisaun F ba asuntu saúde, seguransa sosiál no igualdade jéneru, Noe da Silva Ximenes, nota dezenvolvimentu rai-laran durante tinan 18, porsentu 10 maka  sensível ona ba ema ho difisiénsia fízika.

Depuatdo PLP, Noe da Silva Ximenes. Imajen Tatoli/Egas Cristovão

“Ami sei husu ba Governu atu dezenvolvimentu hosi tinan 2020 ba oin, Governu tenke halo dezenvolvimentu asesível ba ema hotu, liuliu ba ema ho difisiensia sira,” Deputadu Bankada Governu ne’e fó hanoin.

Nia konsidera hanesan devér deputadu atu fó hanoin nafatin ba Governu atu labele husik sidadaun ida hela iha kotuk.

“Ema hotu tenke parisipa iha dezenvolvimentu nasionál hodi hetan asesibilidade. Ita hotu iha devér no direitu atu hetan dezenvolvimentu ne’ebé maka la’o iha ita-nia rai-laran,” nia akresenta.

Deputadu Bankada Partidu Libertasaun Nasionál (PLP) ne’e rekoñese katak fatin no fasilidade públiku seluk seidauk asesível ba ema ho difisiénsia sira.

“Eskola no estrada públiku sira, ita-nia ema ho difisiénsia seidauk asesu ho di’ak, tanba ne’e devér Parlamentu Nasionál maka atu hato’o nafatin ba Governu atu kontinua nafatin implementa buat ne’ebé di’ak ba ita hotu no nasaun,” Prezidente Komisaun F subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here