Primeiru-Ministru Taur Matan Ruak  entrega baindeira Bandeira Nasionál RDTL ba Saudozu Renan Selac nia oan mane, Norberto Dos Santos “Norkiak”. Imajen TATOLI/Eugénio Pereira.

LAUTEM, 15 Juñu 2020 (TATOLI)–Governu Timor-Leste liu hosi Ministériu Asuntu Kombatentes Libertasaun Nasionál (MAKLN) hamutuk no familia sira hala’o ona serimónia funebre ba Saúdozu Veteranu Faustino dos Santos “Renan Selak” iha Jardim dos Herrois e Martires da Patria Lautém.

Antes hala’o funebre, familia sira sei hala’o uluk serimónia rituál iha saudozu nia Knua Ira-Ara-Lospalos hodi entrega hikas ba Governu Timor-Leste ho parade militár ka kruza armas hosi Komponente FALINTIL-Forsa Defeza Timor-Leste (F-FDTL).

Reprezentante Familia, Brigadeiru Jenerál, João Miranda “Aluc Descartes” lori saudozu Renan Selak ho nia Espoza Arminda Gonsalves Kina no oan-ki’ak na’in sia (9) nia naran hato’o agradese ba apoiu tomak hosi Estadu Timor-Leste hodi rekoñese no valoriza saudozu nia luta to’o nia peregirnasaun ba dala ikus nian.

“Nu’udar maun hosi matebin, ha’u hato’o agradese Estadu Timor-Leste no etidades hotu nia prezensa no partispasaun no koleborasuan hosi Orgaun Estadu no Instiusiaun hotu-hotu ne’ebé fó mai partisipa sermónia funebre ba matebian. Ita-boot sira-nia prezensa sai inpirasaun, motivasaun ba ami familia ne’ebé mak lakon alin, aman, maun Renan Selak iha ita hotu nia leet,” dehan Aluc liuhosi ninia diskursu badak.

Governu Timor-Leste liuhosi Ministériu Asuntu Kombatentes Libertasaun Nasionál (MAKLN) hamutuk no familia sira hala’o serimónia funebre ba Saúdozu Veteranu Rezistensia Faustino dos Santos “Renan Selac” iha Jardin dos Herrois e Martires da Patria Lautem.  Imajen TATOLI/Eugénio Pereira.

Nia dehan, apoiu estadu hodi hala’o sermónia funebre iha Lautém nu’udar orgullu ba familia, liuliu amigu veteranu sira hodi rejiaun I, II, III no IV no Prezidente Konsellu Kombatante Libertasaun Nasionál (KNKLN) no povu bele partisipa hodi fó omenajen.

“Ita boot sira-nia apoiu tomak, kooperasaun no ajuda nu’udar familia ami-nia liman-ain la to’o, ami-nia lian la to’o, ho hakraik aan, ami hato’o ami-nia laran terus no agradese ua’in ba imi hotu nia prezensa ba ita-nia kamarada no kompaneiru ne’e,” nia hateten.

Iha fatin hanesan, Reprezentante Lia-Na’in, Lorenco Fernandes hateten, serimónia rituál ne’ebé familia sira halo too prosesu ikus oho kuda-aman ida hodi tara tais nu’udar kultura ida hodi loke dalan ba saudozu nia peregrinasaun ikus.

“Lori familia nia naran, ami hato’o agradese ba Estadu Timor-Leste no bainaka tomak,  serimonia kulturál ami termina hodi entrega hikas ba Estadu,” nia hateten.

Entretantu iha sermonia ne’e, Primeiru-Ministru Taur Matan Ruak hato’o mós mensajen ba Saudozu Renan Selak no entrega hikas Bandeira Nasionál RDTL ba saudozu nian oan mane, Norberto Dos Santos “Norkiak”.

 Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here