Ofisiail Funsionariu husi Ministeriu Solidaderidade kontinua halao pagamentu subsidiu $200 ba komunidade sira iha Sede Suku Bairo Pite,. Imajen/Antonio Goncalves

DILI, setembru 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten daudaun ne’e Governu luhosi ekipa reklamasaun MSSI finaliza hotu ona análiza ba reklamante hamutuk 15.280.

“Durante ne’e ekipa reklamasaun MSSI simu reklamasaun hamutuk 15.764 no agora halo análiza fali, ho ne’e ita finaliza ona reklamante sira-ne’e hamutuk 15.280,” dehan Rui Manuel Gago, ba Agência TATOLI, iha nia knaar  fatin MSSI, Caicoli, Dili, kuarta ne’e.

Nia hateten, hosi reklamante rihun 15.280 ne’ebé ekipa reklamasaun halo análiza hotu ona dadus ne’e hosi 12 munisípiu inklui Rejiaun Administrativu Espesiál Oé-Cusse Ambeno (RAEOA).

Totál reklamante ne’ebé ekipa MSSI simu, nia informa,  Munisípiu Aileu 321, Ainaro 1274, Baucau 893, Bobonaro 1357, Covalima 566, Dili 4786, Ermera 1812, Laútem 939, Liquisa 1131, Manauto 437, Manufahi 337, Oé-Cusse 974, Viqueque 932.

Entretantu, tuir nia, sumáriu jerál progresu análiza ona reklamante kada munisípiu  mak hanesan Aileu 321, Ainaro 1274, Baucau 893, Bobonaro 1357, Covalima 566, Dili 4302, Ermera 1812, Laútem 939, Liquisa 1131, Manauto 437, Manufahi 337, Oé-Cusse 974, Viqueque 932.

Tanba ne’e, nia dehan, ekipa reklamasaun finaliza hotu ona sei haruka naran reklamante hotu ba Ministériu Administrasaun Estatál (MAE) hodi halo verifikasaun liuhosi autoridade sira para kompleta dadus.

“Ita finaliza ona maibé ita sei koordena ho Ministériu Administrasaun Estatál, tanba iha lista balu ita sei presiza halo klarifikasaun. Tanba balun kartaun eleitorál laiha no balu aldeia no suku la klaru, entaun ita presiza klarifikasaun. Tanba ne’e, ekipa reklamasaun sei haruka naran reklamante hotu ba MAE hodi halo verifikasaun liuhosi autoridade sira atu kompleta,” nia dehan. 

Tanba ne’e, nia dehan, bainhira ekipa reklamasaun haruka naran reklamante ba  MAE, sira halo hotu ona verifikasaun, hotu tiha sira fó sira-nia klarifikasaun mak foin MSSI prosesa pagamentu maibé agora finaliza ona no sei presiza informasaun balu hosi Comição Anti Corupção (CAC), ne’ebé maka rekomenda hela mai MSSI hafoin maka halo pagamentu.

“Ita kontinua tenta planu iha fulan setembru nia rohan, lae iha inísiu fulan outubru tinan ida ne’e, maibé kalendáriu fiksu seidauk iha,” nia subliña.

Diretór MSSI ne’e dehan kona-ba prosesu pagamnetu nafatin hanesan uluk maibé sei la involve ema barak, tanba agora ne’e reklamante uituan de’it.

“Kona-ba prosesu pagamentu nafatin hanesan uluk maibé agora ita sei la involve ema barak tanba reklamante agora ne’e uitoan de’it ne’ebé parese ami de’it. Ministra fó ona orientasaun katak bainhira halo pagamentu kada Sentru Solidaridade iha Munisípiu sira mak sei halo pagamnetu. Ne’ebé, ita sei la involve ema barak,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here