Plenária Parlamentu Nasionál. Imajen Tatoli/António Gonçalves

DILI, 16 setembru 2020 (TATOLI)—Parlamentu Nasionál, aban, sei husu justifikasaun hosi Governu kona-ba razaun Governu husu pedidu ho karáter urjénsia ba proposta Orsamentu Jerál Estadu (OJE) 2020.

Iha reuniaun estraordinária, ohin, marka prezensa hosi reprezentante Governu nian atuál Sekretáriu Estadu Komunikasaun Sosiál, Mericio Juvinal “Akara”.

Prezidente Parlamentu Nasionál, Deputadu Aniceto Longuinhos Guterres Lopes, informa ba Sekretáriu Estadu Komunikasaun Sosiál, Mericio Juvinal “Akara” katak aban iha plenária estraordinária iha lorokraik tuku 15.00 hodi halo apresiasaun ba pedidu urjénsia ne’ebé Governu hato’o ona horisehik kona-ba proposta Orsamentu Jerál Estadu 2020 nian.

“Husu prezensa membru Governu sira iha, aban, mai atu justisa pedidu urjénsia ida-ne’e,” Deputadu Aniceto Guterres fó hanoin ba Sekretáriu Estadu Komunikasaun Sosiál, Mericio Juvinal “Akara” liuhosi plenária estraordinária, kuarta ne’e.

Prezidente Parlamentu Nasionál ne’e fundamenta, Governu husu atu parlamentu debate ho karáter urjénsia maibé Governu tenke argumenta mós razaun prinsipál sira.

Entretantu, ohin, Prezidente Parlamentu Nasionál baixa ona proposta OJE 2020 ho karáter urjénsia ba Prezidente Komisaun C (Finansa Públika), Deputada Maria Angélica Rangel, hodi halo apresiasaun durante 24 oras.

Nune’e, aban, Komisaun C aprezenta relatóriu no pareser hosi Governu, ne’ebé tenke marka prezensa hosi Governu tanba Governu mak na’in ba pedidu ho karáter urjénsia ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here