Advogadu Marito da Silva, ne’ebé fó asisténsia legal ba arguidu manifestante AUTL na’in-15 presta deklarasaun ba jornalista sira hafoin rona desizaun TDD nian. Dili, 15 setembru 2020. Imajen Tatoli/Nelson de Sousa

DILI, 15 setembru 2020 (TATOLI)-Liuhusi desizaun  Tribunál Distritál Dili (TDD) nian, ohin, aplika multa $45.00 ba arguidu (manifestante)   estudante Aliansa Universitáriu Timor-Leste (AUTL) na’in-15 ne’ebé halo manifestasaun hasoru Ministru Ensinu Superior, Longuinhos dos Santos.

Notísia Relevante : TDD sei omóloga manifestante AUTL na’in-15

Prosesu ne’e Tribunál notifika arguidu na’in-15 ne’e mak hanesan  Paulo dos Santos Soares, Fidelito dos Santos Lopes, Justino Viegas Lopes, Diogo dos Santos Perreira, Nelson Ximenes, Lola Remegia Maria Moreira, Alzira Soares da Silva, Amino Maia, Francisco Alves de Assis Belo, Cedelicio Moniz, Francisco Marcarenas, Alcino Moniz, Revelino Elias Guterres, Izac Exposto no Cristovão Oliveira Brito.

Iha leitura desizaun, Juiza Maria Solana, hateten, iha  produsaun prova perante iha julgamentu sira liu ba ho auto ne’ebé aprezenta husi Ministériu Públiku (MP)  iha duni faktu provadu katak iha loron 09 setembru, tinan ne’e, purvolta tuku 09:30 Otl, arguidu sira halo asaun manifestasaun iha area besik resintu UNTL nian. Maibé, iha parte lokraik tuku 15:00 Otl, arguidu sira ba hala’o fali manifestasaun tama iha aredór Ministériu Ensinu Superior nian, nune’e la kumpre ona orden lejítimu husi autoridade kompetente ne’ebé antes ne’e iha konkordánsia ona katak asaun manifestasaun refere so bele hala’o de’it iha area besik UNTL nian.

Faktu mós provadu katak, arguidu sira durante  hala’o manifestasaun iha aredór MESK nian  parte Polísia hodi akalma atu hapara, maibé sira-nia parte la koopera kontinua hala’o, tanba ne’e parte polísia hala’o kedas hodi kaptura ho flagante deleitu.

Haree ba sirkunstánsia sira ne’e Tribunál konsidera arguidu sira prienxe elementu krime  nu’udar autór materiál konsumada ba krime dezobediénsia ne’ebé previstu iha artigu 244 kódigu penál Timor-Leste, iha alínea 1. Ema ne’ebé la halo tuir ka la halo tuir nafatin orden ka mandadu lejítimu komunikadu regulármente, ne’ebé autoridade ka funsionáriu kompetente maka fó, sei hetan pena prizaun too tinan-tolu  ka multa: a) Kuandu dispozisaun legál determina; ka b) Kuandu autoridade ka funsionáriu ne’e fó hatene ba ajente katak, nia la halo tuir orden ka mandadu ne’e karik, nia sei hetan responsabilidade kriminál.

Juiza Maria Solana, hateten, husi krime ne’ebé mak imputa ba arguidu sira, tribunál halo fali  analiza katak arguidu hirak ne’e  foin primeira vez ba iha tribunál no seidauk iha rejistu kriminál sira seluk nune’e no hanesan estudante de’it Tribunál entende katak, aplika de’it multa ba arguidu sira ema ida selu $1.00  kada loron to’o loron 45 ho total osan   $45.00  tanba ne’e husi ema na’in-15 multiplika hamutuk $670.00.

Tuir lei    dentru loron 60 arguidu sira la kumpre selu mak sei hetan pena prizaun efetivu loron-30. Enkuantu desizaun Tribunál primeira instánsia parte sira la konkorda (sura hosi leitura akórdaun tribunál) nian ne’e bele halo rekursu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here