Prezidente Repúblika, Francisco Guterres ‘Lú-Olo’ hamutuk ho Prezidente Parlamentu Nasionál, Aniceto Guterres Abertura Da-Tolu Kinta Ligislatura iha Sesaun Plenária Iha Parlamentu Nasionál. iha PN. tersa (15/09). Imajen Tatoli/ Egas Cristóvão

DILI, 15 setembru 2020 (TATOLI)—Parlametu Nasionál no Governu presiza elabora polítika no lejizlasaun hodi fó kbiit ba Estadu tomak hodi foti medida adekuada longu prazu hasoru pandemia globál COVID-19.

Prezidente Parlamentu Nasionál, Aniceto Longuinhos Guterres Lopes hateten, pandemia COVID-19 fó tán todan adisionál ba estadu, aleinde todan ne’ebé mai hosi sosieade Timor-Leste nia perkursu istóriku no dinámika demokrasia iha ita-nia rain.

Nia hatutan, felizmente COVID-19 seidauk oho sidadaun ida maibé seidauk serteza katak nia poténsia dezastroza sei ramata iha tempu badak no  eskapa ona hosi virus ida-ne’e tanba ho razaun siéntista no péritu sira seidauk deskobre aimoruk no meiu adekuada para hamate virus nia espansaun.

“Estadu foin foti medida tempoáriu iha faze emerjénsia hasoru COVID-19, seidauk iha medida estruturante no programada ne’ebé garante ita-nia kapasidade hasoru pandemia ne’e iha tempu naruk. Tanba ne’e importante tebes ba Parlamentu Nasionál no Governu elabora polítika no lejizlasaun ne’ebé fó kbiit ba Estadu tomak hodi foti medida adekuada longu prazu hasoru COVID-19,” Prezidente Parlamentu Nasionál, Aniceto Longuinhos Guterres Lopes, ko’alia iha ámbitu sesaun solene abertura lejizlativa datoluk ba lejislatura dalima, iha plenária Parlamentu Nasionál, tersa ne’e.

Aniceto Guterres fundamenta, medida estruturante hanesan revizaun ba Lei Sistema Saúde, revizaun ba Lei Migrasaun no Azilu no Lei Protesaun Sivíl, presiza fundamenta ho abordazen ne’ebé kle’an no aplikavel.

“Aleinde medida interna saúde públika nian, ita tenke estabelese mós medida ekonómika ho poupansa no reforsa ita-nia polítika no planu rekuperasaun ekonómika hodi bele mantein vida ekonómika Timor-Leste nian labele monu to’o nível ne’ebé afeta estabilidade no seguransa nasionál,” nia dehan. 

Nia hatutan, COVID-19 fó impaktu maka’as ba saúde públika mundiál no ba ekonomia mundiál ne’ebé ultrapasa fronteira nasionál no bele espande to’o ita-nia uma laran.

Tanba ne’e, Prezidente PN ne’e fó hanoin ba Estadu Timor-Leste tenke hasa’e nia kapasidade hodi kontrola movimentu pesoál estranjeiru ne’ebé tama mai Timor-Leste.

“Hasa’e ita-nia kapasidade vijilánsia no kapasidade polítika no dplomátika hodi kontribui mós ba medida preventiva globál ne’e,” PPN hateten.

Jornalista: Evaristo Soares Martins

Editór Cancio Ximenes

HAKEREK NO HATÁN

Please enter your comment!
Please enter your name here