Diretur Online Tempo Timor, Jose Belo. Imajen/TATOLI

DILI, 15 setembru 2020 (TATOLI)–Diretór Tempo Timor no Mídia Na’in, José António Belo, husu ba Conselho de Imprensa (CI) atu rezolve uluk lai problema entre Conselho de Iimprena ho mídia boot lima (5) hanesan  hanesan jornál Suara Timor Lorosa’e (STL), Diário Nacional ka GMN, Timor Post, Independente no Bussiness Timor.

“Tanba ho mídia ne’ebé boot, ami solidariza ona mídia ne’ebé boot no solidariza mós ba Conselho de Imprensa, ho ida-ne’e ami ezije Conselho de Imprensa rezolve uluk lai problema entre Conselho de Imprensa ho mídia boot lima (5) hanesan STL, jornál diáriu ka GMN, Timor Post, Independente, Business Timor para sira mós hola parte. Se lae, ita hili tiha reprezentante ida, reprezentante ne’e ba de’it ita ida hili ne’e ka, ba mídia seluk hotu ne’ebé CI presiza esklarese ba ita,” dehan Diretór Tempo Timor, José António Belo, iha Delta Nova, Comoro, Dili, tersa ne’e.

Ho kestaun ne’e, nia husu Conselho de Imprensa tenke iha kapasidade atu rezolve problema sira-ne’e antes halo konferénsia.

“Tanba ida-ne’e mak ami sente triste, ami triste ho Conselho de Imprensa nia lalaok ida-ne’e, no lei komunikasaun sosiál iha ona. Devia uza lei Komunikasaun Sosiál atu rezolve problema, la’ós kria problema iha problema nia leten no problema ida seidauk rezolve kria tan problema ida tan. Ho ida-ne’e maka ami retira hosi konferénsia ida-ne’e,” José akresenta.

Hatán ba lamentasaun ida-ne’e, Prezidente CI Virgílio da Silva Guterres, hateten maske mídia boot balun lamarka prezensa maibé maioria ne’ebé iha konferénsia ne’e kontinua la’o. Hanesan, nia dehan, ohin iha sira nain-lima (5) mak la mai, agora sira maioria hosi media 28 iha ne’e hela, ne’ebé konferénsia ne’e sei kontinua.

Prezidente K I. Imajen/TATOLI

“Orsida sei konfere, karik forum ida-ne’e liu maioria ona ita bele kontinua. Mídia boot balun la partisipa mós laiha violasaun ba lei, tanba se Konsellu Imprensa hakruuk ba ezejénsia husi Asosiasaun Na’in ba Mídia (ANM), atu limita ema partisipa mídia sira ne’ebé maka tinan 5 ba leten de’it maka bele vota, justru ida ne’e maka ami haree katak viola,” nia dehan.

Nia esplika, tuir lei la hakerek kona-ba ida ne’e maibé lei hakerek de’it sé mak prenxe kritériu Conselho de Imprensa nian no sira ne’ebé rejistadu ona iha direitu tomak atu tuir konferénsia hanesan mídia na’in.

Nia hateten, Conselho de Imprensa mak nia servisu mak atu rejistu órgaun komunikasaun sosiál ne’ebé mak eziste ona iha Timor Leste no bazea ba kritériu hosi Conselho de Imprensa nian.

“Tanba ne’e mak ohin ami konvida mídia na’in 28 ne’ebé rejistu ona iha CI hodi mai partisipa kongressu ba konferénsia hili mídia na’in hodi reprezenta CI ba periódu 2020-2024 nian,” Prezidente Conselho de Imprensa ne’e hateten.

Nia dehan, ohin mídia boot balun la mai maibé iha nia reprezenta ne’ebé mak marka prezensa iha konferénsia ne’e. Tuir nia, Asosiasaun Na’in ba Mídia (ANM) ninia hakarak sira mak propoin atu sira mak organiza konferénsia hili mídia na’in hodi reprezenta mídia na’in iha Conselho de Imprensa.

“Tanba ANM hamosu kritériu ne’ebé mak ami CI labele simu, tanba sira-nia hakarak mídia eziste tinan-lima (5) ba leten mak tuir konferénsia hodi vota. Maibé ami haree ba lei Komunikasaun Sosiál laiha defenisaun ida kona-ba durasaun tinan-lima (5) ka menus maibé iha ne’ebá tenke prenxe rekezitu mak tenke estatutu editorial hanesan sede, konsellu editorial inklui konsellu redasaun,” nia esplika.

Bainhira esklui hotu mídia ne’ebé foin eziste mak ladún di’ak tanba Timor-Leste iha mídia boot lima de’it, entaun ho ida-ne’e CI labele la’o ho kritériu hosi ANM nian tanba CI lakohi deskrimina mídia ne’ebé mak eziste menus hosi tinan-lima (5).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here