DILI, 14 setembru 2020 (TATOLI)-Sekretáriu Estadu Protesaun Sivíl (SEPS), Joaquim Gusmão ho Sekretáriu Estadu Ambiente (SEA), Demetrio Amaral,  ohin, hala’o observasaun direita ba fatin akontesimentu inséndiu ne’ebé rezulta armazén kompañia Foho Osan Mean ho Cahaya  nian ne’ebé ahi-han mutuk  iha Aldeia Meeting 1, Suku Bebonuk, Postu Administrativu Don Aleixo, Munisípiu Dili.

Inséndiu ahi-han ho eskala boot ne’ebé halo nia suar  expulsaun mós maka’as akontese domingu (13/09), purvolta tuku 15:30 Otl, rezulta armazén rua ho ekipamentu médiku no sasán hanesan roda, olio  ho sira seluk tan mutuk didi’ak.

Joaquin Gusmão hateten, inséndiu ne’e presiza oras barak atu kombate tanba sasán sira ne’ebé ahi-han lakan lalais hanesan olio, roda no plástiku no atu hamate ahi ho bee susar maka’as.

Ahi han armazén kompañia Foho Osan Mean ho iha area Bebonuk, Domingu 13 setembru 2020. Imajen/ TATOLI

Atu kombate situasaun sira-ne’e ho di’ak liután, Joaquin Gusmão hatete, Bombeiru presiza iha rekursu númeru ema no ekipamentu ne’ebé adekuadu.

“Horiseik kedas ita iha terrenu to’o horikalan ita la konsege kombate totalmente, maibé ahi komesa ladún lakan ona to’o mai agora ita kontinua halo atuasaun hodi normaliza ahi ne’ebé sei suar ho natoon de’it ona,” hateten Sekretáriu Estadu Protesaun Sivíl, Joaquim Gusmão, bainhira hala’o observasaun  ba lokal akontesimentu.

SEPS mós hetan apoiu  bee husi kompañia lubuk hodi hamutuk ho parte Bombeiru halo  intervensaun ba inséndiu refere.

Joaquin Gusmão relata, tuir informasaun preliminariu ne’ebé investigasaun la’o hela  kauza husi inséndiu ne’e mai husi sirkuitu eletrisidade no akontesimentu ne’e mós rezulta traballadór hetan kanek ne’ebé hala’o ona tratamentu iha Ospitál Nasionál Guido Valadares (HNGV).

Traballadór  husi kompañia Cahaya, Jacinto Maria Babo haktuir katak akontesimentu ne’e kuaze sasán sira  iha armazén laran hanesan roda ba karreta oi-oin, pesa ba karreta oi-oin   no olio husi gazolina to’o gazóleu  ho kuantidade boot la konsege salva

SEPS Joaquin Gusmão ho Sekretáriu Estadu SEA, kontinua fó orientasaun ba ekipa sira hodi  normaliza tiha ahi ne’ebé iha parte balun sei suar, nune’e mós  oinsá kee fatin hodi minimiza olio sulin atu evita tama  ba tasi-laran.

Sekretáriu Estadu Demetrio Amaral hateten, tuir dekretu lei lisensiamentu ambientál tamañu  area ne’ebé empreza okupa mais ektare lima se nia halo armazenamentu ba matéria inflamavel nia tenke hetan lisensa ambiental.

“Ami halo inspesaun dala hira mai empreza sira inklui empreza ida ne’e ne’ebé akontese inséndiu refere tempu balun ami nota sira seidauk iha lisensa ambientál,” nia hateten.

Nia esplika, armazenamentu ba matéria sira inflamavel ne’e fó risku ba sira nia negósiu, komunidade no sidade, tanba ne’e presiza halo tuir padraun protesaun ambiente ninia.

Demetrio Amaral hatutan ba akontesimentu ne’e ekipa sira sei halo investigasaun. Se prosedimentu sira la adekuadu ba halo jestaun ne’ebé di’ak liu Estadu iha direitu atu foti medida hasoru kompañia

Tuir observasaun Agência Tatoli nian iha lokál akontesimentu inséndiu  nota katak, iha dadersán ne’e parte bombeiru kontinua rega ahi iha parte balun  ne’ebé kontinua suar, nune’e mós parte ekipa SEA normaliza hela hodi taka netik rai-henek ba olio ne’ebé sulin  tuir estrada ne’ebé boot tebes hodi minimiza la bele sulin tama ba tasi laran.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here