Komandante Polísia Munisípiu Dili, Superintendente Xefe Henrique da Costa. Imajen Tatoli/Dok.

DILI, 14 setembru 2020 (TATOLI)- Komandu Polísia Nasionál Timor-Leste (PNTL) detein membru grupu ilegál “Natureza Labarik” hamutuk na’in-40 iha sira nia rezidénsia Suku Madohi, Postu Administrativu Don Aleixo, Dili.

Komandante Polísia Munisipiu Dili, Superintendente Xefe, Henrique da Costa deklara, ema hirak ne’e ekipa PNTL kompostu husi  Batallaun Orden Publika (BOP), no Servisu Informasaun Polísia (SIP) detein sira, tanba hala’o ninia atividade adorasaun hodi bosok komunidade sira maioria ferik no katuas husi Munisípiu Baucau.

PNTL identifika grupu “Natureza Labarik” hahú mobiliza membru sira hodi konsentra hamutuk hahú kedas iha loron 30 agostu 2020 too domingu (13/09) maka parte PNTL halo emboskada no detein membru sira-ne’e.

“Ita nia ekipa investigasaun konsege sobu rede (grupu) ida ho naran Natureza Labarik, ita kaptura ema na’in-40, kompostu husi mane 31 no feto ualu (8), inklui sidadaun estranjeiru ida ho inisiál AA,” hateten Komandante Henrique ba jornalista, ohin, iha Komandu PNTL, Caicoli, Dili.

Iha operasaun ne’e, PNTL detein mós ema na’in-rua ho inisiál DJ no DV nu’udar responsavel ba Grupu Natureza Labarik inklui halo mós halo apreensaun ba atributu grupu ne’e nian hanesan, bandeira RDTL rua, bandeira Fretilín rua, no bandeira FALINTIL ida, dokumentu, inklui osan ne’ebé grupu ne’e hetan husi membru sira no ai-han hanesan foos-rai Timor saka 20-liu.

PNTL sei kontinua halo investigasaun ba responsavel grupu ne’e, tanba deskonfia grupu ilegál ne’e bosok komunidade sira hodi apoiu ai-han inklui fundus hodi hamoris grupu ne’e ninia ezisténsia.

PNTL deskonfia grupu ne’e bosok povu sira hodi muda sira nia hanoin no mentalidade atu moris adora de’it lideransa husi grupu ne’e.

“Ema sira ne’e halo sira nia aan hanesan mós no halo ema hotu- hotu atu ba adora de’it sira, tanba señora ida husi estranjeiru ne’e haruka populasaun sira hahán di’ak hanesan, hare-mean, foos-mean, ikan-mean no hahán sira ne’ebé di’ak maka oferese ba nia han,” nia hateten.

Hafoin halo investigasaun remata iha oras 72, PNTL sei aprezenta kazu ne’e ba Ministériu Públiku.

Sidadaun estranjeiru AA ne’ebé PNTL detein la iha dokumentu nanesan pasaporte no kartaun identidade sira seluk, no tuir planu sei aprezenta ema ne’e ba Ministériu Interiór liuhusi Disaun Jerál Servisu Migrasaun hodi koordena ho Embaixada Indonézia atu deporta nia fila ba Kupang-Indonézia.

Tuir dadus ne’ebé PNTL rekolla sidadaun estranjeiru AA ne’e hahú tama mai Timor-Leste iha kedas tinan 2011 too 2014 maka PNTL identifika nia mós uluk envolve iha atividade ilegál balun.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here