Sesaun Plenária Parlamentu Nasionál. Imajen Tatoli/António Gonçalves

DILI, 14 setembru 2020 (TATOLI)—Maske seidauk simu dokumentasaun orsamentál hosi Governu maibé Parlamentu Nasionál (PN) hahú diskute ona kalendarizasaun debate Orsamentu Jerál Estadu (OJE) 2020 no 2021.

Sekretária Meza Parlamentu Nasionál Deputada Lídia Norberta dos Santos Martins, informa reuniaun líder bankada reune ho prezidente komisaun espesializada sira hitu (7) ne’e ho intensaun atu-bele haree kona-ba kalendarizasaun ba diskusaun no votasaun ba Orsamentu Jerál Estadu 2020 no 2021.

“Ohin, reuniaun líder bankada reune ho prezidente komisaun espesializada sira hitu (7) ne’e ho intensaun atu-bele haree kona-ba kalendarizasaun ba diskusaun no votasaun ba Orsamentu Jerál Estadu 2020 no 2021. Reuniaun ida ohin kontinuasaun hosi semana kotuk mantein desizaun ida katak aban hahú lejizlativa foun no iha opurtunidade ne’e Governu sei aprezenta Orsamentu Jerál Estadu 2020,” Sekretária Meza Parlamentu Nasionál Deputada Lídia Norberta dos Santos Martins, informa ba jornalista sira hafoin reuniaun líder bankada, iha salaun konferénsia Parlamentu Nasionál, segunda ne’e.

Deputada Lídia Martins fundamenta, hafoin simu tiha Orsamentu Jerál Estadu 2020, Parlamentu Nasionál buka maneira oinsá mak inkorpora audiénsia, diskusaun iha jeneralidade no espesialidade.

“Tarde liu antes 14 outubru ne’e OJE 2020 ita tenke konsege konklui ona hodi nune’e iha fali 15 outubru respeita nafatin lei hatete ona katak bele submete fali OJE 2021.  Só aban lorokraik ami simu tiha OJE 2020 ne’e mak ami foin hatene montante orsamentu ne’e,” nia dehan.

 Jornalista: Evaristo Soares Martins  

Editór: Cancio Ximenes

HAKEREK NO HATÁN

Please enter your comment!
Please enter your name here