Governadór BCTL, Abraão de Vasconcelos. Imajen Tatoli/Egas Cristovão

DILI, 14 setembru 2020 2020 (TATOLI)-Governadór Banco Central Timor-Leste (BCTL), Abrãao de Vasconselhos, hateten prosedimentu transferénsia fundu petróleu ba konta Estadu estabalese ona iha Lei númeru 9/2005 3 agostu kona-ba Lei Fundu Petróleu, ne’ebé bazeia ba artigu 139 Konstituisaun, mensiona katak petrolíferu hanesan propriedade Estadu.

“Prosedimentu transferénsia estabelese ona iha Lei Fundu Petróleu no mós ninia prosedimentu detallu iha ona akordu jestaun operasionál ne’ebé maka Banku Sentrál selebra ona ho Governu liuhosi Ministériu Finansa, entaun iha akordu ne’e estabelese kedas,” relata  Governadór BCTL ba Agência Tatoli, iha Akait, segunda ne’e.

Nia dehan, transferénsia bele realiza ho autorizaun Parlamentu Nasionál (PN) atu Governu bele utiliza osan hosi fundu petróleu.

“Banku Sentrál hanesan jestór operasionál ne’ebé iha kompeténsia ba jestaun jerál ba fundu no Ministériu Finansa reprezenta Governu no reprezenta tomak ba fundu ne’e, ninia jestaun Governu mak responsabiliza no Banku Sentrál ninia papél ne’e define klaru ona, ne’ebé kuandu laiha autorizasaun hosi Parlamentu labele halo prosesu transferénsia,” nia subliña.

Bainhira lei prevee no hetan aprovasaun hosi PN no promulga ona hosi Prezidente Repúblika maka BCTL bele halo transferénsia tuir pedidu Governu.

“Se lei eziste, bainhira Prezidente Repúblika promulga ona maka Banku Sentrál tenke halo transferénsia. Ita imajina problema saida mak sei mosu bainhira Banku Sentrál rekuza atu halo transferénsia, a não ser la eziste duni kestaun jurídiku,” nia esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here