Jogadór Assalam FC (faru matak) halo xutu bola ba guara rede AS Ponta Leste. Imajen Mídia LFA

DILI, 10 setembru 2020 (TATOLI)-Klube ho naran istimadu Assalam FC susesu iha nia jornada da-tolu hodi halakon ninia adversáriu Zebra FC ho golu 4-1, iha jogu kopa Federasaun Futeból Timor-Leste (FFTL) ne’ebé hala’o iha Estádiu Munisipál Dili, kinta ne’e.

Iha jogu bonitu ne’e ekipa rua lansa kedas kontra atake iha minutu dahuluk nian tuir tékniku idaidak nian.

Zebra domina tebes bola hodi kontra atake maka’as ba liña defeza Assalam nian. Nune’e iha minutu tolu bola barullu iha liña rede Assalam nia oin, jogadór Zebra Elvis da Silva (13) simu bola pasa ho kalma hosi nia amigu Rui Boavida (19) hodi lansa kedan sutu ba rede Assalam rezulta duni golu hodi muda eskoru1-0.

Jogu komesa manas liután,  avansadu Zebra tenta halimar bola long ka bola aas hodi lansa sutu ba rede Assalam maibé sutu hirak ne’e la rezulta golu tanba la kona ninia alvu.

Haree ba Zebra komesa domina iha kampu laran halo treinadór Assalam, Gaspar Quintão nia fuan lá hakmatek hodi halo mudansa derepente ba formatu no muda estratejia jogu.

Nune’e iha minutu 19 jogadór Assalam mediu Mohammed Momi (6) hetan bola hosi nia amigu defeza Husen Ramos (27) hodi halo barullu iha rede Zebra nia oin Mohammed pasa kedan bola ba nia amigu avansadu, Hasan Ramos (7) hodi marka kedan ba rede Zebra halo guarda rede atrapalla no konsege hatama golu 1-1.

Ho rejultadu ne’e, ekipa rua  hatudu jogu bonitu hodi atrai tebes adeptu sira iha tribun leten nune’e hakilar hodi suporta ba ekipa idaidak nian maibé minutu primeira parte nian ramata  mantein ho empata 1-1.

Hakat ba segunda parte, Assalam halo mudansa totál iha nia estratejia halo baralla  treinadór Zebra, Rogerio Mok nia formatu. Nune’e iha minutu 59 Osorio Gusmão (8) les tan golu ida hodi muda rezultadu 2-1.

Hosi golu ne’ebé akontese halo jogadór Zebra hotu nia mentalidade komesa monu neineik no emosaun komesa sa’e lá hatudu ona jogu hanesan primeira parte. Assalam aproveita kedan oportunidade hirak ne’e hodi lansa tan golu iha minutu 74 liuhosi jogadór Bonarudin (17) Amin no 3-1.

Entretantu, iha minutu 78 Hasan Ramos hetan tan oportunidade hodi hatama tan golu ida liuhosi  sutu bola aas hosi nia amigu mediu, Carlos Ximenes (3) iha kampu klaran hosi golu Ramos nian ne’e komesa lori rejultadu golu namlele dook liután hosi Zebra.

Hosi rejultadu ne’ebé iha Assalam komesa halo jogu defensivu de’it lá ansi halo golu kuandu la kona alvu. Halimar bola pasa ba mai iha de’it sira nia área. Zebra lá konsege domina bola iha minutu hirak ne’e, ho nune’e oportunidade monu tan ba Assalam hodi marka tan golu ida hodi muda eskoru ba 4-1 liuhosi Bonarudin Amin iha minutu ’89.

Entretantu,  iha grupu A Assalam FC no Lalenok United FC mak lidera tabela klasifikasaun tanba pontu hanesan 6. Enkuantu DIT FC ho pontu 3 no Santa Cruz FC ho Zebra FC tenke tuur iha liña mean ho pontu zero (0). Enkuantu oportunidade boot ba Lalenok ho Assalam mak atu hakat ba oitavu finál.

Jogu refere dirije hosi árbitru Eufrasio Silva juiz liña Romario Teti, Paulo Costa no ábitru rezerva Carcheres da Silva.

Durante jogu ne’e árbitru sira  konsege fó kartaun kinur ba jogadór Assalam Julio Amaral iha minutu ’49, Hasan Ramos ’57 tanba komete erru hasoru jogadór Zebra no jogadór Zebra ne’ebé hetan kartaun kinur mak Vasco Boavida iha minutu ’39 no Domingos Freitas ’49 ne’ebé komete erru hasoru jogadór Assalam.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here