Eis-FALINTIL Renan Selak

DILI, 10 setembru 2020 (TATOLI)-Saudozo Faustino dos Santos “Renan Selak” iha kinta (10/09) hakotu ona I’is iha Ospitál Nasionál Guido Valadares (HNGV-sigla portugés) Dili tanba sofre moras kurasaun, pulmaun no I’is boot hafoin halo internamentu durante semana ida iha HNGV.

Ministru Asuntu Kombatentes Libertasaun Nasional (MACLN), Julio da Costa “ Meta Malik” informa, antes ne’e Governu esforsu atu lori matebian ba halo tratamentu iha Ospitál Malázia maibé la konsege tanba laiha aviaun atu tula veteranu ne’e relasiona ho COVID-19.

Saudozo daudaun ne’e asume responsabilidade hanesan Vise Prezidente Konsellu Veteranu, tanba ne’e Meta Malik, dehan Governu prepara kondisaun hodi lori saudozo nia isin mate bá ninia knua Lospalos to’o serimonia funebre ikus.

“Governu sei fó apoiu ba ninia família no ba ninia mate isin rasik tanba ninia kontribuisaun ba rai ida ne’e mak ejize partisipasaun Governu nian atu fó apoiu másimu ba ninia família,” katak Governante iha HNGV Dili.

Iha biban hanesan Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, rekoiñese saudozo “Renan Selak” mós hola parte nu’udar fundadór nasaun RDTL.

Tanba durante prosesu luta ba ukun rasik aan, hahú husi 1975 to’o 1981 nia hanesan forsa FALINTIL no depois ida ne’e asume filafali funsaun iha kuadru polítika hanesan  Sekretariu Rejiaun Ponta Leste to’o funu ramata.

Ikusliu, Saudozo nia oan mane, Norkiak dos Santos, konta tuir katak Governu durante ne’e trata ona dokumentu atu halo tranferénsia matebian bá halo tratamentu saúde iha rai-liur, maibé prosesu trata dokumentu seidauk hotu, matebian hakotu ona I’is.

“Ami-nia aman mate ho idade 63,” dehan nia ho tanis. Matebian, mate husik hela fen ho oan na’in neen, feto tolu no mane tolu.

Tuir orariu, iha sesta ne’e, mate-isin sei lori ba Komite Sentrál Fretilin hodi fó omanajen ikus, depois lori bá Parlamentu Nasionál  no ikus lori bá Saudozo nia knua Ira-Ara, Lospalos Vila hodi hein desizaun tuirmai atu haloot matebian nia mate isin.

Jornalista : Tomé Amado        

Editór       : Agapito dos Santos

HAKEREK NO HATÁN

Please enter your comment!
Please enter your name here