Reprezentante UNICEF,USAID entrega ekipamentu promosaun saude ba MS iha Munisipiu Covalima.Imajen TATOLI/Felicidade Ximenes

COVALIMA, 09 setembru 2020 (TATOLI)-Ajénsia Internasionál UNICEF no USAID, iha kuarta ne’e apoiu ekipamentu ba fortalesimentu lidun promosaun Saúde ba Ministériu Saúde hodi entrega ba Sentru Saúde hamutuk hitu iha Munisípiu Covalima.

Fasilidade hirak ne’e iha item hamutuk 14 maka hanesan projetór, screen, DVD player, televizasaun, estante ba TV,  sistema senoru ka sound system, komputadór, mákina imprime, armáriu, kuadru informasaun no utensiliu ne’ebé ho ninia funsaun atu uza ba demostrasaun tein.

Sentru Saúde Suai Villa, Fohorem, Fatumea, Tilomár, Fatululik, Zumalai no Sentru Saúde Maucatar maka sai benefisiariu ba apoiu UNICEF ho USAID ne’e.

“UNICEF hamutuk ho estadu unidos kontenti tebes atu bele apoia Ministériu Saúde atu garante Timoroan hotu nia saúde nafatin sai prioridade no sai sentru maske esforsu boot ne’ebé hala’o dadaun hodi responde ba pandemia COVID-19,” dehan, Reprezentante UNICEF iha Timor-Leste, Valérie Taton, iha salaun Polo Munisípiu Covalima.

Nia dehan, ho apoiu hirak ne’e sei tulun profisionál saúde sira atu halo servisu hodi atende pasiente sira no mós divulga informasaun ba komunidade kona-ba promosaun saúde no prevensaun ba COVID-19.

Iha fatin hanesan  Xefe Misaun Estadu Unidu iha Timor Leste,  Elias Parra, relata ekipamentu hirak ne’e maihosi fundu Estadu Unidu hamutuk $ 500.000 atu halo prevensaun ba COVID-19 iha TL ne’ebé parseria entre UNICEF, USAID no Ministériu Saúde.

Nia informa servisu ne’ebé mak UNICEF halo ne’e apoiu husi Estadu Unidu atu haforsa prevensaun infensaun no kontrola iha fasilidade saude sira.

Nune’e mos Reprezentante husi Ministériu Saúde, Alipio Gusmão, hateten apoiu ne’e sei tulun Governu hodi dezenvolve di’ak liután setór saúde.

“Ministeriu Saude simu ekipamentu ba lidun promosaun saúde sira no kontinua hatudu kompremitidu hodi responde ba COVID-19 tanba ne’e mak ami agradese ba apoiu husi unicef ne’ebé ajuda hodi protese no promove ema hotu nia saúde iha timor leste maske iha tempu ne’ebé mak difisil,” katak Alipio Gusmao.

Serimonia entrega ekipamentu ne’e hala’o iha salaun Polo Munisípiu Covalima no partisipa husi reprezentante UNICEF iha Timor-Leste, Adjuntu Xefé Misaun Estadu Unidu iha Timor-Leste, Reprezentante Administradór Munisípiu Covalima, Diretór Servisu Saúde inklui entidade sira iha Covalima.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here