Provedora Direitu Umanu no Justisa, Jesuína Maria Ferreira Gomes. Imajen Tatoli/Egas Cristóvão

DILI, 08 setembru 2020 (TATOLI)-Provedoria Direitu Umanu no Justisa (PDHJ, sigla portugés) rejista keixa hamutuk 155 hosi sidadaun Timor-Leste.  

Provedora Direitu Umanu no Justisa, Jesuína Maria Ferreira Gomes, hateten keixa 155 ne’ebé rejistadu kompostu hosi indikasaun violasaun direitu umanu hamutuk 59 no indikasaun violasaun boa governasaun 96.

“Depois PDHJ rejista keixa sira, sei halo apresiasaun liuhosi relatóriu avaliasaun preleminár atu identifika keixa sira tama iha mandatu PDHJ ka lae? bainhira tama sei kontinua ho prosesu investigasaun maibé kuandu lae maka sei submete ba entidade kompetente ne’ebé iha liu kompeténsia atu rezolve sidadaun sira-nia keixa,” relata Provedora hafoin ramata enkontru ho PM Taur Matan Ruak, iha Palásiu Governu, tersa ne’e.

Nia dehan, PDHJ sei la rezolve ema-nia keixa no kazu maibé halo de’it apresiasaun no avaliasaun.

“Hafoin konklui investigasaun, sei hato’o rekomendasaun ba entidade relevante hanesan Ministériu, Sekretaria Estadu, no instituisaun públika sira mak iha obrigasaun atu rezolve sidadaun sira-nia problema, Provedoria halo de’it investigasaun no konklui rekomendasaun ba sira,” nia esplika.

Maski nune’e, PDHJ nafatin halo akompañamentu konklui investigasaun no hato’o relatóriu iha loron 60 iha instituisaun relevante.

“Tenke hato’o hikas relatóriu ba PDHJ kona-ba implementasaun ba rekomendasaun sira ne’e, tanba PDHJ iha unidade ida atu haree tuir rekomendasaun ne’ebé sempre akompaña implementasaun rekomendasaun sira ne’ebé rekomenda ona,” nia akresenta.

Enkuantu, iha ámbitu deklarasaun Estadu Emérjénsia (EE) ligadu ho COVID-19 iha Timór iha faze dahaat to’o mai PDHJ seidauk simu keixa hosi sidadaun sira, tanba medida deklarasaun EE ne’e Governu fó fleksibilidade ba sidadaun sira iha territóriu nasionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here