Prezidente CFP, Faustino Cardoso Gomes. Imajen Tatoli/Egas Cristovão

DILI, 08 setembru 2020 (TATOLI)-Prezidente Komisaun Funsaun Públika (CFP, sigla portugés), Faustino Cardoso Gomes, hamutuk ho komisáriu sira hasoru malu ho Primeiru-Ministru (PM), Taur Matan Ruak, hodi hato’o pareser polítika reforma administrasaun públika nian.

“Ami halo audiénsia ho Primeiru-Ministru hodi hato’o pareser polítika reforma administrasaun públika ne’ebé tama ona ajenda diskusaun Konsellu Ministru aban no pareser ne’e nesesáriu duni hodi Xefe Governu informadu kona-ba vantajen no desvantajen ne’ebé presiza hatene molok tama ba diskusaun iha Konsellu Ministru,” relata Prezidente CFP, iha Palásiu Governu, tersa ne’e.

Durante ne’e, Xefe Governu sempre temi polítika reforma ne’ebé VIII Governu atu halo inklui reforma iha administrasaun públika no evolusaun diskusaun sira, iha mós reforma iha ámbitu funsaun públika.

“Komisaun funsaun públika mai hasoru Primeiru-Ministru atu haree kona-ba pareser ligadu ho funsaun públika ninian iha ámbitu atu hasa’e liután efisiénsia no efikásia serbisu funsaun públika,” dehan Faustino.

CFP la’ós órgaun ne’ebé hasai polítika maibé atu implementa politíka Governu nian, atu haree kestaun ne’e relevánsia no kabe ba konsiderasaun membru Governu sira.

Tanba ne’e, CFP nia dever maka hato’o pareser atubele esklaresidu no informadu bainhira foti desizaun no hatene nanis ona vantajen no desvantajen sira.

Tuir Faustino Cardoso, pontu importante hosi pareser maka atu asegura funsaun públika ne’ebé maka servisu ho efikáz, efisiénsia, profisionál, no halo prestasaun serbisu ho kualidade hodi fó satisfasaun ba públiku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here