Reprezentante Igreja, Pe. Domingos da Silva “Maubere”, ohin, sai oradór iha Semináriu Nasionál ba Komemorasaun Loron Levantamentu Armada no Masakre Kraras 1983 ba dala-37 . Imajen TATOLIJoanico de Araujo.

DILI, 08 setembru 2020 (TATOLI)—Reprezentante Igreja, Pe. Domingos da Silva “Maubere”, ohin, sai oradór iha Semináriu Nasionál ba Komemorasaun Loron Levantamentu Armada no Masakre Kraras 1983 ba dala-37 ho tema “Papél Igreja Nian Depois Levantamentu Kraras 1983” iha Salaun Konferénsia Centro Nacional Chega (CNC), Antigu Komarka. Balide, Dili.

Iha semináriu ne’e, Amu Domingos da Silva “Maubere” husu husu ba foinsa’e sira atu estuda didi’ak hodi forma-aan kontinua luta ba nasaunTimor-Leste (TL) nian, tanba funu Timor nia istória konta tuir la hotu tanba funu ne’e povu barak hetan difikuldade maibé ho luta na’in sira-nia esforsu-aan ohin loron Timor-Leste hetán ona ninia indepedénsia, entaun agora ne’e tempu ba foinsa’e sira oinsá hodi luta fali ba dezenvolvimentu futuru nasaun nian ho estuda no estuda.

“Ba foinsa’e sira estuda didi’ak atu nune’e forma imi nia-aan hodi ukun rai ida-ne’e tanba ami-nia luta maluk barak maka mate ona no hela balu de’it maka moris ho objetivu hakarak ukun-aan. Tanba ne’e, tempu agora nasaun presiza tebes imi-nia matenek hodi luta fali ba dezenvolvimentu futuru nasaun nian ho estuda no estuda makaas,” dehan Amu Domingos da Silva “Maubere” lihuhosi ninia aprezentasaun bainhira sai oradór ba Semináriu Nasionál ba Komemorasaun loron Levantamentu Armada no Masakre Kraras 1983 ba dala-37, iha Antigu Komarka, Balide, Dili, tersa ne’e.

Tanba ne’e, nia dehan, futuru nasaun Timor-Leste atu sai nasaun ne’ebé detallu ho loos tenke lori foinsa’e sir aba objetivu ida mak respeita Konstituisaun RDTL tanba atu harii nasaun ne’e liuhosi prosesu no terus boot ida.

“Ba futuru oinsá ita atu halo ita-nia nasaun ne’e detallu ne’ebé ho loos hodi lori jerassun foun sira ba to’o nia objetivu, ita tenke respeita Konstituisaun RDTL tanba ita harii nasaun ne’e ho ita-nia determinasaun. Tanba ne’e, hahú agora kedas, foinsa’e sira presiza no tenke estuda no estuda barak,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here