MTKI no MTKK rona aprezentasaun planu mestre Lagoa Maubara, hosi kompanhia D'Oliveira. Imajen Tatoli/Egas Cristovão

DILI, 07 setembru 2020 (TATOLI)-Governu liuhosi Ministériu Turizmu, Komérsiu no Indústria (MTKI) no Ministériu Turizmu Komunitária no Kulturál (MTKK) akompaña aprezentasaun planu mestre Lagoa Maubara hosi empreza Bernabad Arquitectura no Engenharia SLP no planu mestre ba Marina Square hosi empreza O’liveira, atu dezenvolve sai fatin turíztiku.

Aprezentasaun ne’e partisipa hosi Ministru Turizmu, Komérsiu no Indústria, José Lucas do Carmo Silva, hamutuk ho Vise-Ministru Turizmu, Komérsiu no Indústria, Domingos Lopes Antunes, Vise-Ministra Turizmu Komunitária no Kulturál, Inâcia da Conceição Teixeira, Diretór Jerál Turizmu, José Filipe Dias Quintas, inklui ekipa tékniku sira hosi MTKI no MTKK.

“Ami presiza hatene etapa sira ne’e atubele finaliza. Dahuluk  maka Lagoa Maubara hanesan konseitu di’ak tebes no halo ona konsultasaun kuaze hotu ona inklui Marina Square, atu finaliza lalais prosesu ne’e ba oin atubele hatama iha programa 2021,” tenik Ministru Turizmu, Komérsiu no Indústria, José Lucas do Carmo Silva, hafoin enkontru ho empreza rua, iha edifísiu MTKI, Faról, segunda ne’e.

Tuir Ministru, projetu rua atu konsidera iha planu prioridade 2021, tanba ne’e presiza akumula no halo konsultasaun ho komunidade, líder komunitáriu, inkliu liña ministeriál sira.

Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

Governu mós husu Empreza rua atu inkorpora sustentabilidade ba projetu ne’e, liuliu senáriu ne’ebé prepara atu tasi-been labele estraga tanba gasta osan labele saugate de’it no tenke halo projetu ida ho kualidade.

“Ha’u husu sira halo konsultasaun didi’ak ho komunidade tanba iha área ne’e iha fatin lulik no rate, tanba ne’e presiza koordena atu labele hamosu potensiál konflitu bainhira implementa projetu ne’e,” nia akresenta.

Notísia Relevante: PM orienta MTKI dezenvolve Lagoa Maubara no Eraulo sai sítiu turíztiku

Tuir governante ne’e, atu evita konflitu presiza diskusaun kle’an ho komunidade no akumula hanoin hotu hodi antisipa no prevene bainhira implementa projetu ne’e. Nune’e  Governu hakarak komunidade ne’ebé sakrifika nia-rai no fatin lulik   bele koopera ba dezenvolvimentu ne’e.

“Ohin rona aprezentasaun, maibé kona-ba hanoin komunidade lokál ne’e seidauk mosu ne’ebé husu atu empreza rua ne’e atu haree ba kestaun ne’e molok hatama relatóriu finál,” nia sujere. 

Ministru nota katak, iha esperiénsia barak bainhira Governu atu implementa projetu ida maibé laiha konsiderasaun akumula hanoin komunidade lokál no ikus mai  iha problema no iha risku ba projetu.

Dezenvolve sítiu turíztiku iha Timor-Leste sai hanesan Polítika VIII Governu Konstitusionál atu bele hasa’e vizita turista internasionál no nasionál hodi hatama reseita ba kofre Estadu.

Antes ne’e, Primeiru-Ministru (PM), Taur Matan Ruak, orienta ona MTKI atu dezenvolve Lagoa Maubara iha Munisípiu Liquiçá no Lagoa Eraulo iha Munisípiu Ermera sai fatin turíztiku, ho hanoin katak iha tempu okupasaun Indonézia, Lagoa Maubara sai ona hanesan fatin destinasaun turíztika lokál maibé hafoin Timor-Leste ukun-an fatin ne’e sai abandonadu.

PM Taur sujere iha Lagoa Maubara atu harii mós réplika uma-lisan ne’ebé reprezenta munisípiu 12 inklui Rejiaun Administrativa Espesiál Oé-cusse Ambeno (RAEOA), nu’udar identidade kulturál atubele atrai turizta sira ba vizita sítiu Lagoa Maubara. 

Aleinde ne’e, Xefe Governu mós propoin atu halo jestaun ba lafaek iha lagoa ne’e, tanba daudaun ne’e lafaek barak fuik no abandona iha tasi no mota sira ne’ebé dala barak hakanek no oho komunidade sira, tanba ne’e presiza rekolla lafaek sira hodi tau iha lagoa no jere hosi ema profisionál hodi bele atrai vizitante sira ba haree.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here