Prezidente Repúblika, Francisco Guterres "Lú-Olo". Imajen Tatoli/António Gonçalves

DILI, 05 setembru 2020 (TATOLI)—Prezidente-Repúblika (PR), Francisco Guterres “Lú Olo” argumenta razaun kontinua aplika deklarasaun estadu emerjénsia iha territóriu nasionál hodi hasees propagasaun surtu COVID-19.

Iha loron 06 agostu liubá, Xefe Estadu hato’o mensajen ba povu tomak katak tanba moras COVID-19 presiza moris fulan ida tán ho regra no medida hatuur ho estadu emerjénsia.

Entrerantu iha loron 04 setembru, iha oras 11:59 kalan, estadu emerjénsia dahaat ramata ona. Molok estadu emerjénsia dahaat ramata, Governu hato’o proposta ba Prezidente Repúblika iha loron 27 agostu 2020 atu deklara dala-ida tán estadu emerjénsia ba territóriu nasionál tomak durante loron tolu nulu (30 dias).

Tuir Konstituisaun haruka, Prezidente Repúblika konsulta kedas Konsellu Estadu no Konsellu Superiór Defeza no Seguransa.

Hafoin rona Konsellu rua ne’e, ne’ebé haforsa pedidu Governu, Prezidente Repúblika husu autorizasaun ba Parlamentu Nasionál iha 01 setembru 2020. Ho autorizasaun hosi Parlamentu Nasionál no ho kbiit Konstituisaun fó ba Prezidente Repúblika.

Xefe Estadu deklara Estadu Emerjénsia ba loron tolu nulu tan, hahú ohin, 05 setembru, sábadu, zero oras, no sei ramata iha 04 outubru 2020, domingu kalan, tuku sanulu resin ida no minutu lima nulu resin sia, iha territóriu tomak.

Prezidente-Repúblika haktuir, anúnsiu dahuluk kazu pozitivu iha 21 marsu 2020 to’o agora deteta kazu pozitivu 27 maibé 26 rekupera ona. Na’in-ida de’it mak sei kontinua hela nafatin iha fatin izolamentu, Klínika Vera Cruz, maibé sei la fó risku ba komunidade tanba kontrola hela. Sulan ema mai hosi rai-li’ur iha kuarentena tenke akompaña mós ho medida preventiva sira seluk.

Tuir rekomendasaun hosi Organizasaun Mundial Saúde (OMS) no Ministériu Saúde (MS) medida preventiva importante tebes ne’ebé ema hotu presiza haktuir mak uza máskara,fase liman beibeik ho sabaun no hadook-an malu metru ida ho balu.

“Tanbasá ita kontinua ho estadu emerjénsia. Tanba ida-ne’e medida preventiva ida atu ita hasees-aan hosi moras COVID-19 hada’et ba komunidade hosi sira-ne’ebé tama-mai hosi rai sira seluk, liuliu hosi rai viziñu, Indonézia no Austrália. Númeru kazu pozitivu konfirmadu sa’e liután iha ita-nia país viziñu. Loro-loron mosu tan kazu konfirmadu foun. Iha Austrália mate ona ema atus neen resin. Mate ona iha Indonézia ema liu rihun hitu, inklui iha Nusa Tengara Timur, provínsia halo fronteira ho Timor-Leste,”  Prezidente Repúblika, Francisco Guterres “Lú Olo”, fundamenta liuhosi komunikadu imprensa ne’ebé Agência TATOLI, asesu hosi Palásiu Prezidensiál, Aitarak-Laran, sábadu ne’e.

Nune’e, moras COVID-19 labele tama tan, iha momentu ne’ebé de’it, hosi ema ne’ebé hakaat fronteira-rai, fronteira-tasi, mai ho karreta ka la’o ain, aviaun ka ró. Moras foun ne’e bele tama diretamente ho ema mai hosi rai-li’ur ka hosi sira-ne’ebé kontakta ho sira ka hosi sasán kontaminadu ho vírus ne’ebé kauza moras COVID-19.

Mensajen Xefe Estadu nian subliña, hotu-hotu ne’ebé tama hosi dalan legál ka hosi dalan ilegál, la hatudu kedas sinál katak bele iha moras COVID-19. Enkuantu hela iha kuarentena, balun hatudu sinál katak bele iha moras COVID-19. Pesoál saúde halo kedas teste.

Banhira rezultadu teste fó-sai pozitivu ba ema ruma, pesoál saúde haketak no lori kedas ema ne’e bá fatin izolamentu, Klínika Vera Cruz, hodi labele hada’et ba ema seluk.

Atu hasees moras tama komunidade, hotu-hotu ne’ebé tama iha kuarentena tenke halo teste molok sai hosi ne’ebá. Karik ema ruma pozitivu, sira-ne’ebé tama-mai hamutuk ho nia, tenke hela tán loron sanulu resin haat, iha kuarentena. Ida-ne’e mak prosedimentu loos hodi prevene no kontrola moras COVID-19.

Xefe Estadu fó hanoin ba povu tomak, moras COVID-19 bele tama lalais liu ho ema ne’ebé asintomátiku katak ema ne’e lori hela vírus iha nia isin maibé nia rasik la hatene-an tanba laiha sintoma ka la sente moras.

“Tanba nia la sente no ita la haree sinál moras nian, ema asintomátiku ne’e la kuidadu-aan no ita mós la kuidadu-an tanba ita hanoin nia la’ós problema mai ita. Ita bolu ema ne’e portadór vírus. Sé ita hosik ema portadór vírus tama de’it iha Timor-Leste, ita fó lisensa ba mós vírus ne’e tama iha ita-nia rain,” Xefe Estadu hateten.

Tanba ne’e mak importante hatama ema iha kuarentena obrigatória atu pesoál saúde bele halo kontrole di’ak no la hosik vírus ne’e hada’et hosi ema ba ema.

Bainhira Estadu hatama ema asintomátiku ida iha kuarentena, Estadu suspende ema ne’e nia direitu, liberdade no garantia fundamentál balun ne’ebé Konstituisaun fó ba ema hotu. Direitu sira-ne’ebé suspende mak labele la’o ba mai iha territóriu laran, labele simu família no amigu sira enkuantu hela iha ne’ebá no labele hili hela-fatin tuir sira-nia hakarak rasik. Biar balun bele hela iha uma rasik, tanba iha kondisaun, ekipa vijilánsia tenke tau-matan atu sira kumpre regra kuarentena nian.

Durante loron sanulu resin haat, ba ema sira-ne’ebé tenke sulan-aan iha fatin-kuarentena ka iha uma rasik, Estadu la’ós limita de’it maibé suspende sira-nia direitu, liberdade no garantia fundamentál balun ne’ebé temi ona.

Nune’e, suspensaun ba direitu, liberdade no garantia fundamentál balun halo tuir limites ka sasukat Konstituisaun nian, maibé la halakon.

“Ha’u husu ba maluk sira hotu atu tuir medida estadu emerjénsia ne’ebé autoridade kompetente sira sei implementa. Husu mós ba entidade responsável sira atu fornese meiu protesaun ba pesoál liña-oin no haree oinsá kontrola di’ak liután iha fronteira, aeroportu, portu, pontu entrada ne’ebé de’it no fatin-kuarentena, atu Covid-19 labele hada’et ba komunidade. Ita hotu tenke preokupa ho kondisaun servisu di’ak ba pesoál liña-oin, ne’ebé servisu loron-kalan, hodi proteje ita hotu hosi moras aat ne’e,” Xefe Estadu fó hanoin.

Prezidente Repúblika agradese apoia ba estadu emerjénsia hato’o hosi arsebispu metropolitana, Dom Virgílio do Carmo da Silva, iha 2 setembru, loron tolu liubá, iha parókia Comoro.

“Ha’u fiar katak ho apoiu nafatin hosi sosiedade sivíl tomak no ajénsia internasional sira, liuhosi ida-idak nia esforsu ka nu’udar grupu, ekipa sira koordena no lidera hosi Ministériu Saúde bele hala’o sira-nia servisu ho di’ak. Hasees-an hosi moras COVID-19 importante tebes ba ita idak-idak hodi ita bele tau-matan ba ita-nia família, amigu sira, komunidade no Povu tomak,” dehan PR Lú Olo.

Xefe Estadu hein katak país sira ho siénsia no teknolojia moderna hetan lalais vasina nu’udar meiu atu hasa’e ita-nia defeza no hasees ita hothotu hosi moras COVID-19. Enkuantu Timoroan sira servisu hamutuk ba prevensaun no kombate COVID-19, Governu Timor-Leste, nu’udar órgaun ezekutivu, buka mós dalan atu oinsá hasa’e dezenvolvimentu lalais liu, ho benefisíu ba povu tomak.

Ho Planu Rekuperasaun Ekonómika ba tempu badak, médiu no naruk, Xefe Estadu fiar katak sei la’o ba oin organizadu liu, iha prosesu haburas lalais Timor-Leste no lori povu ba moris-di’ak. Maibé atu Timor-Leste buras babeibeik, ita presiza mós moris saudável.

“Ho kuidadu sira ne’e mak ita hala’o ita-nia servisu loron-loron durante estadu emerjénsia ida-ne’e. Instituisaun públika no privada, eskola, loja, merkadu, transporte no fatin públiku ne’e bé de’it sei la taka. Toos-na’in no traballador ne’ebé de’it bele halo servisu baibain,” mensajen Prezidente Repúblika, Francisco Guterres “Lú Olo”.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here