Saudozu Tomás Correia de Oliveira Alias “Oli Lemorai”. Imajen/Espesiál.

Saudozu “Oli Lemorai” hakerek nia naran ne’e iha besi riti ida hanesan tuir São João dehan, “Ha’u hakarak hakerek ha’u-nia naran iha besi riti kro’at ida, atu ema hotu ne’ebé liu hateke ba besi riti ne’e sona nia fuan”, ho sentidu katak provoka jerasaun foun sira atu aprende ba luta no esforsu ne’ebé saudozu “Oli Lemora” halo hodi kontra invazór Indonézia durante tinan 24 nia laran no lori nia misaun to’o habahat (mengukir) Timor-Leste nia ukun rasik-aan.

DILI, 05 setembru 2020 (TATOLI)—La’o lemorai hosi knua ida ba knua seluk. La’o lemorai hosi foho ida ba foho seluk. La’o lemorai hosi ai-laran tuan ida ba ai-laran tuan seluk. La’o lemorai, hosi knua ba knua, hosi foho ba foho, hosi ai-laran tuan ba ai-laran be tuan liu, nia dedika-aan la snte kolen hodi hala’o misaun “lulik” ida mak hakarak povu no rai-lulik Timor-Leste ne’e sai na’in ba nia rain rasik no sai na’in ba nia povu rasik.

La’o lemorai, hosi knua ba knua, hametin nia “luta” hamutuk ho membru FALINTIL sira seluk iha ai-laran hodi luta ba Timor-Leste nia ukun rasik-aan, saudozu Tomás Correia de Oliveira luta durante tinan 24 nia laran iha ai-laran, hodi deskobre naran “lulik” ida sai ninia naran revoluzionáriu mak “Oli Lemorai”.

Lahatene! Naran ne’e ninia magarti loloos ne’e sa’ida. Dalaruma na’in mak hatene. Dalaruma ninia maluk luta-na’ira mak sira mak hatene ho di’ak. Maibé, klaramente, naran “Oli Lemorai” ne’e, dalaruma, reprezenta saudozu ninia dedikasaun no luta durante tinan 24 nia laran iha ai-laran. Luta ne’e luta nafatin. Nunka rende no nunka hanoin hetan atu fila-fali mai vila laran hodi moris hamutuk ninia família sira iha vila laran.

Luta ne’e luta ho fuan. Luta ne’e luta ho domin. La’os luta naran luta de’it no luta saugate de’it. Hafoin saudozu “Oli Lemorai” luta makaas no manan tiha Timor-Leste nia independénsia, iha tinan 2010, saudozu tenke luta makaas ba ninia “moras” rasik ne’ebé afeta hosi “kilat musan” funu nian ne’ebé haknuuk-aan nafatin iha ninia isin-lolon, halo nia hetan moras SCI (struck) iha ninia “tulang ekor” no afeta tan moras diabetes ka raan midar.

Iha tinan 2010, Saudozu “Oli Lemorai” hahú moras no konsege halo konsulta iha Surabaya-Indonézia. Iha ne’ebá, m’ediku espesialista sira halo diagnostika hatudu katak saudozu hetan moras SCI (Struck)  iha nia “tulang ekor” ne’ebé to’o ikus la kosenge rekopera no loron-kalan saudozu la’o labele no sadere-aan de’it iha kadeira ka fatin-toba.

Luta ba nia moras ne’e rasik lori tempu naruk. Moras, moras hela de’it. Terus, terus beibeik. Sente hanesan, moars ida-ne’e halo nia terus liu fali bainhira nia luta iha ai-laran hodi luta hasoru invazór Indonézia liuhosi tiru malu. Ninia luta ba ninia moras ne’e, to’o ikus moras ne’e mak konsege domina nia isin-lolon tomak, mak iha loron 28 fulan agostu 2020, família sira lori halai ba Hospital Nacional Guido Valadares maibé baixa de’it semana ida. To’o ikus iha loron 2 fulan setembru 2020, iha horas 12:15 oras Timor-Leste, Maromak moris nia na’in bolu hikas Saudozu “Oli Lemorai” ba Maromak nia uman.

Bainhira fila kotuk la’o ba Maromak nia uman, saudozu husik hela feen-kaben, Juvita da Costa hosi Aldeia  Fainehan, Suku Fainehan, Postu Admnistrativu Fatuberliu, Munisípiu Manufahi, no husik hela nia oan hamutuk na’in-hitu (7) mak hanesan Leo da Costa Oliveira, Natalino da Costa Soares, José da Costa Pinto, Rosentino da Costa Pinto, Domingas da Costa Pinto, Domingos  Sávio  Pinto de Oliveira, no Norberto da Costa (Matebian).

Luta Ba Libertasaun Nasionál

Durante Indonézia invade Timor-Leste, Saudozu Tomás Correia de Oliveira ho naran revolusionáriu “Oli Lemorai“ nunka hamutuk ho ninia inan-aman, maun-alin sira, no parente sira hodi ko’alia kona-ba lia fetosan-umane, lia-mate ka lia-moris, sau-batar no sau-haree, maibé tempu ne’e tomak nia oferese-aan luta ba povu no Timor-Leste nia independénsia hodi hakruuk ba filizofia “Mate ka Moris, Ukun Rasik Aan”.

Atu luta ba Timor-Leste nia ukun rasik-aan, nia luta manan nia aan rasik no luta manan ninia “ukun rasik aan” no ninia “ukun-aan rasik”, oinsá nia bele “ukun-aan” hodi “ukun” nia rasik luta ba libertasaun nasional, mak hanesan tuir mai;

Iha loron 20 agostu–27 novembru 1975, saudozu nu’udar  Frente Armada  no Kuadru Civil ho Posto Komandante Pelotão no Grau 3 (tres) iha Organizasaun Comite Central Fretilin- FALINTIL ne’ebé responsavel husi Komandante João Branco.

Iha loron 28 novembru–06 dezembru 1975, saudozu nu’udar Frente Armada Nn Kuadru Militaá ho Postu Komandante Pelotão no Grau 3 (tres) iha organizasaun Comite Central Fretilin (CCF)- FALINTIL, ne’ebé responsavel hosi Komandante Valente Soares.

Iha loron 07 dezembru  1975–28 fevereiru 1977, saudozu nu’udar Frente Armada no Kuadru Militar ho Postu Komandante Pelotão no Grau 3 (tres) iha organizasaun Comite Central Fretilin-FALINTIL, ne’ebe responsavel husi Komandante Valente Soares.

Iha loron 01 marsu 1977–31 dezembru 1978, saudozu nu’udar Frente Armada no Kuadru Militár ho Postu Komandante Pelatão no Grau 3 (tres) iha Organizasaun Comite Central Fretilin-FALINTIL, ne’ebé responsavel husi Komandante Valente Soares.

Iha loron 01 janeiru 1979–02 marsu 1981, saudozu nu’udar Frente Armada no Kuadru Militár ho Postu Assistente Polítiku Rejiaun no Grau 2 iha organizasaun Força da Guerilha–Bolsa da Resistensia ne’ebé responsavel husi Komandante Faustino Dos Santos.

Iha Loron 03 Marsu 1981 – 31 Marsu 1984, Saudozu Nu’udar Frente Armada No Kuadru Civil Ho Postu Assistente Politiku Rejiaun no Grau 2 iha organizasaun Força da Guerilha – Bolsa da Resistensia.  Ne’ebe Responsavel Husi Komandante Faustino Dos Santos

Iha loron 01 abril 1984–31 dezembru 1986, saudozu nu’udar Frente Armada no Kuadru Civil ho Postu Assistente Politiku Rejiaun no Grau 2 iha organizasaun Força da Guerilha–Bolsa da Resistensia ne’ebé responsavel husi Komandante Faustino dos Santos.

Iha loron 01 janeiru 1987–31 dezembru 1992, saudozu nu’udar Frente Armada no Kuadru Civil ho Postu Assistente Politiku Rejiaun no Grau 2 iha organizasaun Força da Guerilha-Bolsa da Resistencia ne’ebé responsavel hosi Komandante Faustino dos Santos.

Iha loron 01 janeru 1993–14 setembru 1998, saudozu nu’udar Frente Armada no Kuadru Civil ho Postu Assistente Politiku Rejiaun no Grau 2 iha organizasaun Commite Excutivo da Luta– Frente da Clandestina–Concelho Nacional da Restencia Maubere (CNRM), ne’ebé responsavel husi Komandante Faustino dos Santos.

Iha loron 15 setembru 1998–25 outubru 1999, saudozu nu’udar Frente Armada no Kuadru Civil ho Postu Assistente Politiku Rejiaun no Grau 2 iha Organizasaun CNRT–Frente Politica Interna-Rejiaun 1, ne’ebé responsavel hosi Komandante Faustino dos Santos.

Hafoin iha era Ukun Rasik Aan ne’e, Primeiru Dezmobilizasaun hosi Estadu Timor-Leste ba FALINTIL-Forsa Defeza Timor-Leste (F-FDTL) iha loron 20 agostu 2001, Saudozu “Oli Lemorai” dezmobilizadu ho  24 anos ho Postu Assistente Escalão Um (1).

Iha 2001 tun hosi Aileu, saudozu hala’o servisu iha Sekretáriu Estadu Solidariedade Sosiál iha tempu primeiru Governu Konstitusionál, saudozu hanesan Pontu Vogál ba Responsavel hodi verifika dokumentu veteranu 24 anos nian. Ho mundansa politika ne’ebé la’o, Sekretáriu Estadu Solidariedade Sosiál muda ba Minsitériu Solidariedade Sosial, saudozu kontinua servisu ba ministériu refere ho estatutu funsionáriu permanente ho nivel tres, hafoin muda muda fali ba Dirasaun Kombatente nian.

Kondekorasaun

Haree no tetu hosi Saudozu “Oli Lamorai” nia luta be hakerek iha “lista” naruk ne’e, hanesan “luta” ida-ne’ebé nakonu ho “domin” ida-ne’ebé susar atu sukat no susar atu haluha. Tanba ne’e, Estadu Timor-Leste lahaluha fó apresizasaun no fó rekoñesimentu hodi fó kondekrasaun hanesan;

Iha loron 15 dezembru 2012, Estadu Timor-Leste Kondekora Saudozu “Oli Lemorai” ho Ordem da Guerilha ba Escalão Um (1) 24 anos ba tempu.

Iha loron 28 novembru 2018, Saudozu “Oli lemorai” hetan kondekorasaun hosi Estadu Timor-Leste ho Ordem Nicolau Lobato.

Bigráfia

Saudozu Tomás Correia de Oliveira Alias “Oli Lemorai“ moris iha Aldeia Vaniria, Suku Eukisi, Postu Admnistrativu Lautém, Munisipiu Lautém, iha loron 12 Dezembru 1956. Saudozu nu’udar oan hosi inan-aman Norberto da Costa (Matebian) no Maria da Costa (Matebian).

Saudozu nu’udar  oan dahuluk hosi maun-alin hamutyk na’in-lima (5) mak hanesan; Resinoko ho nia kodigu “Maun Mean” (Matebian), António de Oliveira kodigu “USA–NOKO”  (Matebian), Filomeno de Oliveira kodigu “BADA–KAI” (Matebian), Filipe da Costa, Na–Lesa, kodigu Boy Anan Timur (Matebian).

Abilitasaun Literária

Saudozu “Oli Lemorai” hahú eskola iha tinan 1962 nu’udar 1a klasse iha eskola primária Laivai no  iha tinan 1964–965 saudozu kontinua nia estudu 20 no 30 klasse iha eskola kompanhia Lospalos.

Edukasaun Ba Foinsa’e Sira

Maski Saudozu “Oli Lemorai” fila hikas ona ba Aman Lalehan nia uman, maibé ninia luta ba povu no rai-lulik Timor-Leste ne’e “la mate” hanesan nia isin-lolon ne’ebé mate ona rai taka tilun, labele rona ona. Maibé, bo ninia luta naruk durante 24 anos ne’e, Saudózu “Oli Lemorai” nia naran hakerek ho tinta “osan-mean” iha “besi riti” Timor-Leste ida be kro’at hanesan São João hatetn, “Ha’u hakarak hakerek ha’u-nia naran iha besi riti kro’at ida atu ema hotu ne’ebé liu hateke ba besi riti ne’e sona nia fuan”.

Liafuan hosi São João ne’e, ho sentidu pozitivu “sona ema-nia fuan” katak provoka ema hotu liuliu juventude (foinsa’e) sira atu aprende saida maka saudozu ne’e halo no luta saida mak nia konsege luta ba povu no rai-lulik Timor-Leste ne’e ninia autodeterminasaun.

Saudozu “Oli Lemorai” mós provoka timoroan sira hotu liuhosi ninia istória moris-nian la’ós hela nostalgia de’it maibé maibé oinsá mak saudozu ninia esperiénsia no esforsu tomak kontra invazór Indonézia durante tinan 24 nia-laran ne’e, sai hanesan “edukasaun ida” ba timoroan sira liuliu juventude sira oinsá mak firme iha vizaun no misaun atu tenke lori misaun ne’e to’o rohan.

Ohin no ba nafatin, Saudozu “Oli lemorai” nia naran hakerek ona iha “Timor-Leste nia “besi riti” be kro’at atu timoroan sira hosi jerasaun ba jerasaun bele haktuir no temi nafatin Saudozu “Oli Lemorai” nia naran nafatin ba nafatin. Adeus Veteranu 24 Anos..! Adeus Saudozu “Oli Lemorai”..!! Hakmatek ho dame iha reinu lalehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here