Jogador Assalam FC.Imajen/Midia FFTL.

DILI, 04 setembru 2020 (TATOLI)-Klube Assalam FC konsege halakon ninia klube adversáriu DIT FC ho valór 3-1 durante joga kontinuasaun Kopa Federasaun Futeból Timor-Leste (FFTL) époka 2020 ne’ebé hala’o iha Estádiu Munisipál Dili.

Iha minutu dahuluk, bainhira jogu ne’e hahú ekipa rua lansa kedas kontra atake ba malu tuir idaidak nia tékniku klube nian.

Jogadór husi Assalam dalabrak halimar ho bola rai no DIT halimar bola long, maibé iha de’it minutu ’11, sorte monu ba Assalam liuhosi nia jogadór, Hasan Ramos, ho númeru kamijola (7) konsege fura rede DIT lihosi bola barullu iha liña oin nune’e eskoru muda ba 1-0.

Jogu kontinua manas liutn husi tékniku ne’ebé ekipa rua hatudu maibé sorte monu nafatin ba Assalam iha minutu ’45, jogadór Assalam ,Bonarudin Amin (17) les tan rede DIT hodi muda eskoru ba 2-0. Ho nune’e minutu primeiru ramata  ho rezultadu 2-0.

Iha parte daruak, ekipa rua mantein posizaun ne’ebé di’ak liuhosi kontra atake, maibé Assalam iha forsa ne’ebé maka’as tebes.

DIT aproveia oportunidade barak hosui nia jogadór sira maibé esforsu hirak ne’e lakon le’et de’it tanba lá fó rezultadu no sutu barak mak avansadu DIT lansa la kona iha alvu nune’e DIT nafatin hela ho 0.

Iha minutu ’79, Bonarudin Amin (17) iha tan oportunidade hodi hatama tan golu ida hodi muda rezultadu namlele do’ok ona hosi DIT. Maski rezultadu sa’a  aas tebes ona DIT nafatin mantein posizaun hodi luta to’o iha minutu ’87, konsege muda duni rezultadu ba 3-1 liuhosi golu ne’ebé hatama husi jogadór, Lourenço Ximenes (10) hodi nune’e ikusmai termina jogu ne’e ho 3-1.

Jogu ne’e dirije husi Árbitru Francisco Pereira, úuiz liña Romario Teti, Emiliano Araujo no árbitru rezerva Elisio Lopes.

Treinadór Assalam Gaspar Quintão, agradese bele hetan pontu tolu no ba oin sei hadi’a di’akliu nune’e bele avansa ba oitavu finál.

“Agradese tanba ami bele hetan pontu tolu, ba oin ami sei hadi’a di’ak liután para bele avansa ba oin,” dehan treinadór ne’e.

Iha fatin hanesan treinadór DIT Mial Armand,  sente triste ho rezultadu ne’e maibé rezultadu jogu mak nune’e tenke simu no ba oin sei hadi’a ho diak.

“Ohin iha fallansu uitoan iha liña klaran no oin mak ami lakon ne’e, maibé rezultadu tenke simu ba oin ami sei hadia iha jogu tuirmai,” nia konfesa.

Jornalista: Hortencio Sanchez

Editór   : Agapito dos Santos

HAKEREK NO HATÁN

Please enter your comment!
Please enter your name here