Grupu NAE hamutuk ho autoridade lokál konserva ai-parapa iha área tasi ninin, aldeia Sakato, suku Nipane, sub-rejiaun Pante Makasar, foin lalais ne’e. Imajen/GASC

DILI, 04 setembru 2020 (TATOLI)-Koordenadór Gabinete de Apoio Sociedade Civil (GASC), Filipe da Costa, louva atividade grupu Naijan Atoni Enklave (NAE) ne’ebé ho dedikasaun tomak no serbisu maka’as konserva ai-parapa liuhosi programa viveiru no reflorestasaun iha parte tasi ninin.

Iha tinan 2019, grupu NAE iha Rejiaun Administrativu Espesiál Oé-cusse Ambeno (RAEOA) hetan apoiu fundu apoiu hosi sosiedade sivíl hodi hala’o atividade konserva ai-parapa iha rai ektare 11 iha RAEOA, ne’ebé atividade ne’e inklui viveiru ai-parapa no atividade ortikultura.

Tuir nota ne’ebé Agência Tatoli asesu iha sesta ne’e, bainhira ekosistema ai-parapa moris ho di’ak, maka biodiversidade Timor-Leste sei fresku no buras, no mós peskadór no komunidade kosteira sira bele aumenta sira-nia rendimentu.

Razaun halo konservasaun tanba haree ba mudansa klimátika mundiál ne’ebé halo tasi sa’e, tempestade, bailoron naruk, no temperatura aas ne’ebé ohin loron afeta tebes ba ezisténsia ai-parapa sira iha Timor-Leste.

Koordenadór GASC subliña, pilár estratéjika GASC ba tinan 2021 maka hakarak harii sosiedade sivíl ne’ebé institusionál ho papél forte no programa kontribui ba “Sosiedade Timor Haksolok”.

Primeiru-Ministru, Taur Matan Ruak, liuhosi Gabinete GASC fornese apoiu ba atividade organizasaun sosiedade sivíl sira atu asegura implementasaun polítika VIII Governu Konstitusionál.

Loron dahuluk kuda ai-parapa 500 iha rai ektare sia

Xefe Suku Nipane, Pedro Eko, informa iha loron dahuluk, tersa (01/09), NAE no autoridade lokál organiza komunidade atu kuda ai-parapa hamutuk 500 rai ektare sia, ne’ebé lokaliza iha aldeia Sacato.

“Objetivu kuda ai-parapa mak atu proteje komunidade-nia atividade hakiak ikan salmaun no mós proteje ambiente tanba área kostál iha aldeia Sacato no seluk tan kuaze lakon ona,” dehan Pedro Eko iha serimónia kuda ai-parapa, aldeia Sacato, suku Nipane, sub-rejiaun Pante Makasar.

Ai-parapa hamutuk 500 ne’ebé sei kuda iha aldeia Sakato. Imajen/GASC

Autoridade lokál ne’e agradese ba GASC no NAE ne’ebé apoiu ona viveiru ai-parapa ba komunidade iha faze dahuluk hamutuk 500 hodi kuda iha área kostál aldeia Sacato.

Sorin seluk, Reprezentante Koordenadór GASC, Edvin Duarte Soares Noronha, dehan GASC fó apoiu finanseiru hamutuk $7.315 ba atividade entre fulan jullu to’o dezembru 2019 hodi konserva viveiru no kuda ai-parapa hodi proteje ambiente iha RAEOA.

“Ami envolve kuda ai-parapa ne’ebé realiza hosi NAE ho komunidade hodi kuda ai-parapa iha aldeia Sacato, suku Nipane, sub-rejiaun Pante Makasar iha rai hamutuk ektare sia, ne’ebé oferese husi xefe suku atu kuda ai-parapa, nune’e bele proteje tasi sa’e, tempestade, rai-manas, bailoro naruk iha aldeia refere,” nia akresenta.

Nia nota katak, iha área kuda ai-parapa ne’e komunidade uza ba hakiak ikan salmaun hodi fornese ba merkadu lokál maibé tuir informasaun katak produsaun ikan salmaun lahó másimu tanba mudansa klimátika.

Edvin Duarte konsidera, kuda ai-parapa kontribui ba dezenvolvimentu florestál no hadi’ak rendimentu ida sustentável ba família no komunidade iha futuru.

Ai-parapa proteje ambiente

Sekretáriu Rejionál Agrikultura RAEOA, José Eta, konsidera programa kuda ai-parapa importante tebes hodi proteje ambiente iha Aldeia Sacato no RAEOA ein jerál.

“Ha’u agradese ba Xefe Suku ne’ebé oferese rai, NAE ne’ebé implementa atividade, komunidade ne’ebé voluntariamente kuda ai-parapa, no Gabinete de Apoiu Sociedade Civil ne’ebé apoiu finanseiru hodi realiza programa ne’e,” dehan Sekretáriu Rejionál Agrikultura ne’e.

Autoridade lokál aldeia Sacato kuda ai-parapa iha área tasi ninin. Imajen/GASC

Sekretáriu Rejionál, José Eta, dehan programa ne’e importante tebes hodi kontinua ho razaun área kostál sira iha RAEOA barak mak ai-parapa mohu ona, tanba ne’e autoridade RAEOA sei kolabora ho NAE atu organiza povu atoni-oan hodi nafatin realiza atividade kuda ai-parapa iha fatin ne’ebé autoridade identifikadu ona.

Entretantu komunidade Aldeia Sacato sente kontente ho atividade kuda ai-parapa ne’e no kompromete sei kontinua servisu hamutuk ho NAE no autoridade lokál atu proteje ai-parapa ne’ebé foin kuda, inklui halo planu mós ho sira bainhira ai-parapa boot ona.

“Ami modifika atu sai objetu turístiku ida atu atrai turista, tantu lokál no estranjeiru sira,” nia akresenta.

GASC fó apoiu finanseiru iha tinan 2019 ba NAE hodi konserva, proteje, no kuda ai-parapa iha RAEOA, maibé tanba problema ne’ebé nasaun enfrenta hanesan COVID-19 no Estadu Emerjénsia, maka kontinuasaun atividade kuda-ai parapa foin realiza fali iha setembru 2020.

Tuir planu, NAE sei kuda iha tempu badak ai-parapa hamutuk 5.600 iha kosteira norte RAEOA nian.

Serimónia kuda ai-parapa envolve mós entidade husi reprezentante Terra no Propriedade, lideransa lokál, grupu komunidade no membru GASC.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here