Diretora INS sesante Selia Gusmao entrega termu servisu ba Diretora foun, Domingas Pereira.Imajen Felicidade Ximenes.

DILI, 04 setembru 2020 (TATOLI)-Diretora sesante Institutu Nasionál Saúde (ICS-sigla portugés), Selia Gusmão, sesta ne’e entrega ona termu servisu ba Diretora foun Domingas Pereira.

Serimonia entrega termu servisu ne’e hala’o iha salaun ICS Comoro Dili, iha ne’ebé asiste diretamente husi Ministra Saúde, Odete Maria Freitas Belo.

Diretora foun sei asume responsabilidade ne’e to’o loron 31 dezembru 2020, hodi hein konkursu foun tuir méritu.

“Ha’u hanesan Diretora Sesante durante hahú servisu iha INS iha loron 02 fulan-marsu to’o 31 agostu 2020 no servisu ho orsamentu duodesimu, orsamentu husi parseiru sira, inklui orsamentu COVID-19,” informa nia iha ninia diskursu ohin.

Ho limitasaun orsamentu iha ninia mandatu la konsege implementa servisu barak maibé foka de’it ba formasaun kona-ba COVID-19, formasaun kona-ba moras hada’et sira, HIV/SIDA no seluk tan.

“Iha planu barak mak ita hanoin hamutuk atu halo mak ita hamutuk atu hadi’a filafali ita-nia planu estratéjiku dezenvolvimentu 2020 no 2024 ne’ebé mak iha,” tenik Selia.

Iha 2021, importante liu maka atu hadi’a Estatutu INS, rejime formasaun hodi suporta funsionamentu instituisaun Estadu ne’e.

“Planu sira ne’e bele Diretora foun hala’o ba hodi ita hadi’a hamutuk INS ne’e ba oin no mós hadi’a diak liután kualidade formasaun iha INS ne’e ba oin,” nia esplika.

Iha sorin seluk, Diretora INS foun, Domingas Pereira , agradese ba konfiansa ne’ebé maka oferese husi Ministériu Saúde atu lidera instituisaun ne’e to’o dezembru 2020.

”Nu’udar funsionáriu públiku prontu atu hala’o desizaun no husi superóir irárkiu sira no desizaun ne’e sei to’o iha 31 dezembru 2020 hodi hein prosesu tuir meritu tanba ne’e mak husu ba pesoál INS tomak atu bele aplikasaun ba konkursu ne’e bainhira iha ona avizu,” dehan Nia.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here