Plenária Parlamentu Nasionál. Imajen Tatoli/António Gonçalves

DILI, 03 setembru 2020 (TATOLI)—Reprezentante povu iha Uma Fukun Parlamentu Nasionál (PN) kestiona makaas kapasidade Governu nian ezekuta Fundu COVID-19 tanba lista reklamasaun, pagamentu ba otél sira no ekipa liña-frente balun seidauk simu subsídiu.

Deputadu Bankada FRETILIN Joaquim dos Santos, husu Governu esplika kompromisu sira ne’ebé promete ona ba pesoál sira iha front line, subsídiu ba família sira no subsídiu ba estudante sira.

“Governu iha ona kompromisu ba ida-ne’e ka seidauk, saida mak impede. Se la kumpre karik ninia impedimentu baze ne’e saida, ha’u atu hakarak hatene de’it ida-ne’e,” Deputadu Joaquim dos Santos, levanta liuhosi plenária Komisaun Permanente nian iha Parlamentu Nasionál, kinta ne’e.

Entretantu Deputada Bankada CNRT, Maria Fernanda Lay protesta Governu kona-ba ezekusaun entre 17 abríl to’o 24 jullu 2020 ba Parlamentu Nasionál no Prezidente Parlamentu Nasionál hato’o ba komisaun iha 01 setembru 2020.

“Iha períodu 17 abríl ba 31 agostu foin iha 02 setembru, ne’e la justu. La fó tempu ba deputadu sira atu lee dokumentu ne’e. Iha dekretu-lei kona-ba fundu COVID-19 hatete periodikamente Governu tenke hato’o nia ezekusaun no saldo la’ós akumulativu. Parlamentu la’ós mákina ida hatama ba hodi fó analiza mai ita. Ami presiza hato’o pergunta balun ba membru Governu kona-ba asuntu ne’e, liuiu rejista iha pájina 5 hosi relatóriu 17 abríl to’o 24 jullu. Iha-ne’ebá deteta iha diferensa ne’ebé ita iha segunda vez millaun $60 ita fó-fila $500 mill,” dehan Deputada Maria Fernanda Lay.

Membru Komisaun C ne’e husu Ministériu Finansa atu esplika kle’an ezekusaun ne’e molok Parlamentu Nasionál autoriza tán Estadu Emerjénsia dalima.

Deputada Maria Fernanda Lay husu Governu esplika mós aluga karreta ne’ebé to’o agora seidauk halo pagamentu, Governu la fasilita máskara ba komunidade, distansiamentu sosiál sai konfuzaun iha sosiedade, otél sira mós seidauk selu hotu no bee-moos atu fase-liman mós laiha.

“Tanba saida, pagamentu atarazadu, primeirra pagamentu ba benefisiáriu mós seidauk hotu, 100 dollar tuir programa governu nian mós ha’u la haree iha-ne’e, ne’e programa governu ne’ebé parlamentu simu”, dehan nia.

Purtantu Deputadu Bankada KHUNTO, Luis Roberto, hateten kestaun estende ka lae ne’e la importante, importante mak kompromisu governu nian liuhosi fundu COVID-9 ne’e tenke ezekuta ho loloos.

“Ami ba baze rona lia tanba povu kbiit laek sira to’o agora seidauk hetan osan, la’ós estende estadu emerjénsia dalima ou lae maibé tenke responde situasaun povu ninian, balun hatama ona reklamasaun maibé até agora seidauk selu. Membru Governu kompletu tiha ona, nusá mak ezekusaun fundu COVID-19 ne’e la la’o, problema iha-ne’ebé,” nia dehan. 

Entretantu Deputada CNRT, Virgínia Ana Belo, sekunda ideia hosi Deputadu Luis Roberto nian tanba membru Governu kompletu maibé ezekusaun la la’o.

“Membru Governu kompletu kapasidade mak inkompletu, troka ema tún-sa’e mak hanesan ne’e. Pagamentu ba otél ba sira mós seidauk hotu, pagamentu ba front line sira mós seidauk selu hotu, ida-ne’e mak kapasidade governu nian”, hateten Deputada Bankada CNRT ne’e.

Tuir relatóriu ezekusaun orsamentu fundu COVID-19 entre 17 abríl to’o 31 agostu 2020 atinje ona 55.0% hosi levantamentu estraordinária dahuluk no daruak hamutuk $220,248,000 ho ninia konkreta  (totál pagamentu) hamutuk $121, 147,68.

Fundu COVID-19 $220,248,000 halo prevensaun no mitigasaun ba COVID-19 hamutuk $103,568,315. Hosi orsamentu $ 103,568,315 komposta hosi garantia kuarentena adekuada $1,836,062, identifika kazu COVID-19 no deteta kontaktu (contact tracing) $ 416,664, izola no trata kazu covid-19 $10,419,815, reforsa medida distansiamentu sosiál, ijiéne no protesaun pesoál iha komunidade $613,635, apoiu sosiál no ekonomia ba populasaun afetada $82,179,393, apoiu operasaun prevensaun no mitigasaun $ 8,028,706, planu kontijénsia para COVID-19 $74,040.

Nune’e mós hasa’e sustentável produsaun no produtividade kultura alimentár hamutuk $1,051,409, asesu produtu alimentár, la’ós alimentár no serbisu hamutuk $16,527,895. Entretantu aumentu ka dimimuisaun kaixa hamutuk $99,100,382.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here