Primeiru-Ministru, Taur Matan Ruak hamutuk ho Membru Governu Sira partisipa iha Debate kona-ba pedido Autorizasaun ba Renovasaun Deklarasaun Estadu Emerjênsia husi Prezidente Repúblika, iha Sala Plenáriu PN, kinta (03/09). Imajen Tatoli/Egas Cristovão

DILI, 03 setembru 2020 (TATOLI)-Primeiru-Ministru (PM) no Ministru Interiór, Taur Matan Ruak, hateten Governu daudaun ne’e kontinua toma medida ba pasajen ilegál sira iha fronteira terrestre, hanesan harii tan postu ualu ba Unidade Polísia Fronteira (UPF) hodi kompleta postu 30-resin ne’ebé harii ona.

“Governu deside aumeta postu iha fronteira, hosi fronteira Maliana no Suai aumenta postu foun haat no Oé-cusse sei aumenta postu haat. Konstrusaun daudaun la’o hela ho kooperasaun Austrália,” informa PM Taur iha plenária Parlamentu Nasionál, kinta ne’e.

Aleinde ne’e Governu mós halo levantamentu hodi hadi’a postu sira iha fronteira, iha área Oé-cusse maka Sakato, Oésilo, Citrana, iha área Maliana maka Tunu-bibi no Mota-ain no área Suai maka Salele.

Ministru Interiór ne’e rekoñese postu ba UPF laiha kondisaun atu asegura no kontrola liña fronteira terrestre sira entre Timor-Leste no nasaun viziñu Indonézia.

“Ha’u hanesan Ministru Interiór rekoñese situasaun postu sira iha fronteira ne’e difikuldade liuliu kona-ba situasaun ita-nia Polísia Unidade Fronteira atu kontrola pasajen ema tama ilegál no sasán,” nia realsa.

PM hato’o kestaun ne’e hodi responde preokupasaun deputadu sira atu mellora postu sira iha fronteira atu UPF bele asegura di’ak liutan iha fronteira terrestre atu prevene kontájiu surtu COVID-19 hosi nasaun viziñu.

Nia nota katak Timor-Leste ninia fronteira ne’e maihosi konsekuénsia okupasaun portugés no olandés iha Indonézia, ne’ebé hafahe ema sira iha relasaun família ho área ne’ebé besik malu.

“Atu muda situasaun ne’e posível atu indika, tanba ne’e Governu halo esforsu hotu atu tempu ba tempu  bele konsolida forsa kontrola fronteira ho denvolvimentu sidadaun sira tanba pasajen ilegál sira presiza duni konsensializa ba populasaun besik fronteira terrestre sira atu intende no bele koopera tanba ne’e pasu fundamentál importante atu asegura fronteira sira,” nia akresenta.

Aleinde ne’e, atu kontrola movimentu iha fronteira terrestre, Governu hanaruk tempu ba ema no sasán bele tama no sai.

“Ba sasán semana ida dala-ida iha kuarta oras rua, sesta filafali no ba ema loron 17 dala-ida tanba ita ninia kapasidade kuarentena bainhira ita loke tutuir malu, ema tama barak maka tama, ita laiha kondisaun atu simu. Entaun ita halo métodu ne’e atu kontrolu liután,” nia hatutan.

Ministériu Interiór (MI) no Ministériu Defeza no Seguransa (MDS) daudaun ne’e deskute hela kona-ba  rejime foun ba seguransa fronteira, ba tarefa FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi asegura fronteira sira.

“Ami haree seriamente ba rejime foun atu garante seguransa fronteira nian,” Ministru Interiór afirma.

Governu mós husu ona Konsuladu Timor-Leste iha Indonézia, atu ema ne’ebé tama Timor-Leste presiza rejistu atesidénsia no troka nota iha fronteira hodi asegura pasajen sira.

“Ida-ne’e hanesan forma organizada no kontroladu liu, nune’e bele evita moras ne’e hadaet iha rai-laran. Iha situasaun ne’e ita-nia medida tenke korresponde ba risku ne’ebé iha, maski ita-nia intensaun atu sidadaun sira bele ba mai livre maibé ita labele halo tanba situasaun COVID-19 hanesan situasaun foun ba ita hotu no laiha país ida iha mundu maka preparadu ba ida ne’e no Timor-Leste la’ós esesaun,” nia dehan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here