Diretór Jerál DNRN, Crisogno da Costa Neto. Imajen/Domingos Piedade

DILI, 03 setembru 2020 (TATOLI)-Governu liuhusi Ministériu Justisa (MJ) liuhusi Diresaun Nasionál Servisu Rejistu Notariadu (DNSRN) sertifika ona ema estranjeiru na’in-1.020 hodi sai sidadaun Timor.

Ema hirak ne’e hetan sertifikasaun dezde tinan 2007 to’o mai 2019, liuhusi kategoria tolu hanesan kaben ho timor-oan, naturalizasaun no naturalizasaun husi altu relevante.

Husi númeru ne’e mai husi sidadaun Indonézia na’in-957, Portugal na’in-11, Australia na’in-haat (4), Brazil na’in-rua (2), Cuba na’in-ida (1), Paquistaun na’in-ida (1), India na’in-rua (2), Bangladesh na’in-ida (1), Filipina na’in-tolu (3),Vietnam na’in-ida (1), Xina na’in-ida (1), Srilingka na’in-ida (1), Mozambique na’in-tolu (3), Béljika na’in-ida (1).

“Husi atribuisaun kategoria tolu ne’e durante sertifika nasionalidade ba ema estranjeiru por kazamentu na’in-977, por naturalizasaun na’in-12, por altu relevante servisu na’in-31,” informa Diretor Jerál Rejistu Notariadu, Crisogno  da Costa Neto, ohin,  ba Agência Tatoli iha nia kna’ar fatin, Caicoli, Dili.

Nia esplika, por kazamentu maka  Timor-oan  feto ka mane ne’ebé kaben ho ema estranjeiru maizumenus tinan-lima (5) ona permanente hela iha Timor-Leste no por naturalizasaun ema estranjeiru la’ós kaben ho ema Timor maibé Estadu Timor-Leste mak bolu atu fó servisu ba sira halo, ezemplu hanesan jogador sira.

 Altu relevante servisu ema estranjeiru ne’ebé mai halo servisu boot iha rai-laran Estadu Timor-Leste labele halo ne’ebé kleur  hela iha Timor fó kontribuisaun boot ba dezenvolvimentu país nian. Ezemplu hanesan Padre Locateli, SDB iha koléjiu Fatumaca, Baucau.

“Kompeténsia ne’ebé iha Ministériu Justisa so admite de’it nasionalidade ba kategoria rua por kazamentu no naturalizasaun  no altu relevante servisu,  ida ne’e kompeténsia Prezidente Parlamentu mak fó maibé rejistadu prosesu nafatin iha notariadu,” esplika Crisogno  da Costa Neto.

Diretór Jerál Crisogno  da Costa Neto  hateten, sidadaun hirak ne’e  prienxe ona kritéria ba prosesu halo rekerimentu ho dokumentu komprovativu hanesan sertidaun kazamentu, sertidaun moris no seluk tan hodi submete ba parte sira hanesan Ministru Justisa no Presidente Parlamentu Nasionál  hodi estuda kuandu hatún despaxu ona ba fali Diresaun Notariadu hodi bele realiza teste.

Servisu Rejistu Notariadu ho kooperasaun Ministériu Edukasaun halo teste ba matéria lingua ho kultura kuandu pasa sei halo verifikasaun komportamentu liuhusi Ministériu Públiku

“Kuandu laiha buat ida ami bele atribui nasionalidade, maibé kuandu la liu pasiénsia hein hodi tuir fila-fali iha tempu seluk” hateten Crisogno da Costa Neto.

Regulamentu ba lei nasionalidade nu’udar diploma legál ne’ebé permite atu implementa Lei Nasionalidade n.º 9/2002, 5 novembru, no lei ida-ne’e haree kona-ba norma hirak ne’ebé tau iha artigu 3.º konstituisaun repúblika demokrátika Timor-Leste.

Liu hosi artigu sira ne’ebé integra iha kapítulu sira, atu regula liuliu, kona-ba dokumentu hirak ne’ebé presiza atu instrui prosesu, prosesu administrativu hodi adkiri, lakon no rejista nasionalidade Timorense. Prosesu sira hala’o ho ekilíbriu no simples, bazeia ba realidade, no garante ema-interesadu sira-nia direitu ba nasionalidade Timorense lahó hadook hosi norma konstituisaun nian.

Hatán  kona-ba durante ne’e preokupasaun públiku katak, atribuisaun nasionalidade ba ema podér ekonómiku no (podér sosiál iha kargu ka elite) kuandu kaben ho ema Timor hetan lalais de’it nasionalidade, maibé ema ne’ebé ki’ik hela kleur la hetan sertifikasaun ne’ebé deskonfia iha pratika ‘subornu’, Crisogno da Costa Neto,  lia tun dehan, durante prosesu no rekizitu sira aplika hanesan ba ema hotu, katak laiha diskriminasaun tanba ne’e ba sidadaun estranjeiru ne’ebé seidauk hetan kontinua hakbesik aan ba parte notariadu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here