Logotipu ASEAN. Imajen/Espesiál

DILI, 02 setembru 2020 (TATOLI)-Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, halo aprezentasaun ida ba Konsellu Ministru hodi relata pontu situasaun prosesu adezaun Timor-Leste nian ba Asosiasaun Nasaun Sudeste Aziátiku (ASEAN, sigla inglés).

“Aprezentasaun ne’e iha ámbitu preparasaun ba ronda daruak iha reuniaun ho Misaun Averiguasaun ASEAN, ne’ebé sei realiza iha loron 08 to’o 10 setembru liuhosi vídeo-konferénsia,” hateten Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, kuarta ne’e.

Ministru haktuir, MNEK aprezenta mós meta prinsipál sira ne’ebé alkansa ona, hahú hosi submisaun formál ba kandidatura adezaun ASEAN iha 2011, estratéjia nasionál ba prosesu adezaun no konkista prinsipál ne’e.

Antes ne’e, ekipa Fact Finding Mission ho delegasaun ema na’in-60 ba dahuluk mai Timor-Leste hodi halo avaliasaun ba preparasaun adere ba ASEAN.

Nune’e mós, Governu Timor-Leste liuhosi MNEK hamutuk ho liña ministeriál iha tinan 2019 liubá konsege responde ona pergunta hamutuk 60 hosi Sekretariadu Organizasaun Sudeste Áziatiku kona-ba pilár sósiu no kultura, liuliu iha área edukasaun, saúde, jéneru, direitu labarik, ambientál no seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here