Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (02/09). Imajen Tatoli/Egas Cristovão

DILI, 02 setembru 2020 (TATOLI)Ministru Transporte no Komunikasaun, José Agustinho da Silva, aprezenta proposta rezolusaun Governu kona-ba ezonerasaun Ana Rosália Ximenes Varela, hodi nomea Eusébio Freitas ba Prezidente Konsellu Administrasaun Prezidente Autoridade Avisaun Sivíl Timor-Leste (AACTL, sigla portugés) foun ba períodu 2020 to’o 2024.

Ministru Prezidénsia Konsellu Ministru, Fidelis Manuel Leite Magalhães, hateten motivu ezonerasaun bazea ba avaliasaun ne’ebé Ministru José Agustinho halo.

“Nomeasaun ne’e ho misaun atu garante seguransa sistema transporte aéreu,” tenik Ministru Fidelis, iha Palásiu Governu, kuarta ne’e.

Ba kargu vogál Konsellu Administrasaun AACTL nian nomea Domingos Sávio de Jesus Sarmento, liuhosi proposta Ministériu Transporte no Komunikasaun no Geovanio M.R. Hei Henriques, liuhosi proposta Ministériu Finansas nian.

Iha sorin seluk, Prezidente AACTL sesante, Ana Rosália Ximenes Varela, ladún simu ho desizaun.

“Ha’u la simu desizaun Governu hodi ezonera ha’u, tanba desizaun ne’ebé Ministru José Agustinho halo ne’e ho intensaun polítiku. Durante ne’e Ministru nunka avalia ha’u-nia serbisu, derepende de’it ezonera ha’u,” Ana Rosália lamenta.

Prezidente sesante ne’e konsidera desizaun ne’e ladún justu.

“Ha’u bele simu desizaun Governu bainhira tuir dalan legál,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here