Diretór Ezekutivu Centro Nacional Chega, Hugo Maria Fernandes. Imajen Tatoli/Joanico de Araújo

DILI, 02 setembru 2020 (TATOLI)–Centro Nacional Chega (CNC) daudaun ne’e dezenvolve polítika no programa hosi VIII Governu Konstitusionál nian mak koko se rejistu fila-fali sobrevivente no vítima violasaun direitu umanu ne’ebé akontese iha Timor-Leste hahú hosi 1974-1999 ne’ebé moris namkari iha Timor-Leste.

Diretór Ezekutivu Centro Nacional Chega, Hugo Maria Fernandes, hateten programa rejistu ba sobrevivente no vítima sira-ne’e foku liu ba kategória vitima ne’ebé nesesita tratamentu saúde mentál, tratamentu saúe fíziku no dadur sira ne’ebe sobrevive ekonomikamente ne’ebé presiza atu hetan tulun ruma.

“CNC sei halo rejistu ne’e ba kategoria tolu (3) mak, ida, vítima sira ne’ebé mak nia kondisaun nesesita tratamentu saúde mentál tanba vítima barak mak sofre hela trauma ba akontesementu pasadu sira. Rua, vítima ne’ebé mak nesesita tratametu saúde fíziku. Tolu, ema sira ne’ebé tama dadur laiha oportunidade sobrevive ekonomikamente tanba sira presiza tulun ekonomiku,” dehan Hugo Maria Fernandes ba Agencia TATOLI iha ámbitu komemorasaun Masakre Setembru Negro iha Suai ba dala-21 (06 setembru 1999-06 setembru 2020) iha nia knaar fatin, Antigu Komarka, Balide, Dili, tersa ne’e. 

Kona-ba vitima sira ne’ebé atu halo tratamentu fiziku, Hugo Fernandes hatutan, tenke tau matan ba sira tanba rona kuaze loro-loron no kada fulan iha notísia katak derepente vítima ida mate, balun foinsa’e ho idade 30 no 40 maibé sofre hela tanba uluk karik dadur ka kastigu no hetan torturasaun oin-oin derrepente de’it mate no laiha ema ida mak tau-matan ba sira.

Nia esplika, polítika ida-ne’e CNC bolu polítika hakbiit sobrevivente sira atu nune’e vitima sira-ne’e bele hetan apoiu ka tulun ekonómiku. Ba asuntu ne’e, nia dehan, CNC kontinua servisu hamutuk ho organizasaun sosiedade sivíl sira hodi bele rejistu ba vítima no sobrevivente sira ba akontesementu iha tempu pasadu liuliu 1974-1999.

“Daudaun ne’e ita la’o hela hodi fó rejistu ba sira. Ita koopera ho Asosiasaun Vítima sira iha Timor-Leste nian iha munisípiu sira hotu. Ita koopera ho rezisténsia no organizasaun sosiedade sivíl sira. Kleur ona ita halo servisu ida-ne’e hodi halo rejistu úniku ida para hatene loloos vítima loloos ne’e sé, vítima ne’e hira no ita tulun oinsa ba sira,” nia dehan. 

Hugo Fernandes haktuir, to’o agora polítika ne’e aprova iha 2019 no parseria di’ak tebes mak Ministériu Solidaridade Sosiál no Inkluzaun (MSSI) tanba rekursu finanseiru atu tulun vítima sira-ne’e sei mai hosi MSSI ne’ebé aloka orsamentu ba 2020 nian, infelizmente OJE 2020 retirada tiha entaun CNC labele implementa.

Nia informa, to’o ohin loron naran sira ne’ebé rejistu no iha ona baze dadus iha ona mil pesoa ne’ebe sei haree ba kategória tolu (3), no tinan ne’e loloos CNC halo ona apoiu ba 400 pesoa tanba OJE 2020 retiradu mak labele uza osan ne’e. 

Nia hateten, obrigasaun CNC nian mak tenke halo kooperasaun ho Governu liuliu ho MSSI no Minsiteriu Saude atu hatama rekomendasaun “Chega!” ba polítika sira-nian. Ho ida-ne’e mak durante ne’e CNC halo maibé apoiu hosi sosiedade sivíl kontinua la’o no tulun hanesan finanseira ne’e seidauk halo maibé hanesan liman-etun ne’e iha.

Tanba, nia dehan, antes CNC harii iha ona organizasaun sosiedade sivíl sira hanesan FOKUPERS, HAK, AJAR, Acbit, Uma Mahon sira ne’ebé mak haree direta no hetan apoiu hosi Governu para tulun fali vítima sira entermu apoiu finanseiru no tratamentu saúde.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here