Embaixadór Xina, Xiao Jianguo entrega máskara ba Vise Ministru Interior, Antonio Armindo. Imajen/Dok.Tatoli

BOBONARO, 31 agostu 2020 (TATOLI)- Vise-Ministru Interior (MI) António Armindo, hamutuk ho Diretór Jerál Servisu Migrasaun Superintendente Xefe Agostinho Gomes da Silva, no Komandante Unidade Patrullamentu Fronteira (UPF), Superintendente João Sancho Pires, distribui máskara 10.000-resin ba Igreja, Sentru Saúde no estudante sira iha liña fronteira hodi prevene propagasaun surtu COVID-19.

“Ohin ita halo distribuisaun máskara 2.000 ba iha Eskola Sekundária Jerál  Colegio do Verbo Divino Palaka, tanba ita hotu hatene katak, máskara hanesan instrumentu importante ida atu proteje aan, família, kolega no sosiedade husi surtu COVID-19. Máskara hirak ne’e, ita hetan apoiu husi Governu Xina, nune’e ha’u lori governu nian naran hato’o agradesimentu ba embaixada Xina ne’ebé ho solidariedade fó ona tulun no apoia ba Governu Timor-Leste hodi luta hasoru surtu mundiál COVID-19. Ita espera ho apoiu sira ne’e bele proteje di’ak liután ita nia komunidade sira iha liña fronteira ne’e,” hateten Vise-Ministru Armindo liuhusi komunikadu imprensa ne’ebé Agência Tatoli asesu, ohin.

Máskara hirak-ne’e, Vise-Ministru entrega direta ba Padre Manuel Pinto, SVD ne’ebé sei fahe ba nia estudante hamutuk 450 iha eskola sekundária jerál  koléjiu do Verbo Divino.

Biban ne’e, Vise MI husu ba dirijente eskola sira, atu uza fasilidade ne’e halo prevensaun ba COVID-19.

Iha oportunidade ne’e, Vise-Ministru ho ekipa kontinua fahe mós máskara 20.000 ba profisionais saúde sira hodi luta hasoru surtu COVID-19 iha sentru saúde Balibo ne’ebé simu direta husi  Helena Perreira nu’udar enfermeira iha sentru saúde refere, no ikus liu fahe mós máskara 2.000 ba iha Amu pároku Vanislaus Kopong SVD iha Igreja Parókia Santo António Balibo, Postu Administrativu Balibo, Munisípiu Bobonaro no  fahe mós  máskara 4.000 ba Igreja Batugade.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here