Xefe Estadu Maiór F-FDTL Majór Jenerál Lere Anan Timur. Imajen Tatoli/António Goncalves

DILI, 31 agostu 2020 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, sei haruka forsa sira kaptura  portavós Grupu Rezistensia Nasionál Defende Justisa no Konstituisaun RDTL  (RNDJK), Angela Freitas ho António Aitahan Matak, ne’ebé organiza masa popular hodi halo “manifestasaun” hasoru  Prezidente Repúblika, Francisco Guterres Lú Olo.

Notísia Relevante : PNTL aseita pedidu RNDJK halo “manifestasaun” hasoru PR Lú Olo

Lere dehan, hanesan veteranu rezisténsia tinan-24 ne’ebé komanda F-FDTL sei la permite kuakér grupu organizasaun ida atu halo asaun “golpe” kontra lider rezisténsia sira hanesan, Kay Rala Xanana Gusmão, Taur Matan Ruak no Francisco Guterres Lú Olo.

“Ha’u rona Angela dehan atu hatún prezidente iha loron 4 setembru 2020. Ha’u husu ba  Angela ó maka hatún prezidente ka haruka tali mak sa’e fali ó. Loloos ne’e ita nia governu la podia simu ona ema ida hanesan Angela Freitas  iha Timor, biar nia Timoroan, tanba krize 2006 nia halo Majór Alfredo Reinado mate, Mauk Moruk mate tan. Ha’u la husik kualkér ema hatún ha’u nia maun sira ne’ebé uluk komanda funu hahú husi Maun Xanana, Taur no Lú Olo, Mari Alkatiri no Ramos Horta,” afirma Komandante Lere Anan Timur ba jornalista, hafoin hala’o enkontru ho veteranu rezisténsia F-FDTL sira iha Kuartél Jenerál, F-FDTL, Fatuhada, Dili.

 Lere dehan, asaun pasífiku ne’ebé grupu RNDJK halo maka mosu kazu krime ruma, nia rasik sei lori forsa ba kaer hotu lideransa másimu ne’ebé organiza asaun ne’e.

“Ha’u sei haruka futu, kesi Angela sira ne’e hotu, Aitahan Matak sama belar hotu. Ha’u hanoin bele hatún joven sira Aniceto Guterres, ka hatún ministru foun sira ne’e bele hatún. Mais ha’u dehan katuas sira ne’e, sira sei hatún husi demonstrasaun, ha’u haruka forsa sama sira. Ha’u responsabiliza ba hatán iha tribunál no iha direitu umanu,” Lere afirma.

Lere dehan, Estadu RDTL ne’e harii ho ema barak nia mate no sofrimentu. Tanba ne’e nia sei la permite ba kualkér grupu atu sobu unidade lider nasionál sira no sobu nasaun RDTL.

“Uma nasaun Timor-Leste ne’e ami maka harii, agora ó hakarak duni ami sai husi uma-laran. Ó la’ós uma na’in tan. Posa ha’u nia feton, ha’u nia doben ne’e dala ruma hanoin ladún loos ona karik,” dehan Lere ho hirus.

Nia dehan, atu hatún kargu Prezidente Repúblika tenke kumpre regra demokrasia liu husi eleisaun prezidentensiál, povu maka determina nia votu hodi hili prezidente repúblika símbolu unidade nasionál no reprezenta povu no Estadu RDTL.

Komandante F-FDTL ne’e lia-tun ba Angela Freitas no António Aitahan Matak atu respeita lider nasionál sira. Tanba sira fó aan ba mate durante tinan-24 ho povu hodi harii nasaun ne’e.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here