Sekretáriu Estadu Kooperativa, Elizário Ferreira. Imajen Tatoli/Egas Cristovão

DILI, 29 agostu 2020 (TATOLI)-Sekretaria Estadu Kooperativa (SEKoop) iha ona planu ba tinan 2021 atu fortalese kooperativa sira liuhosi kapitalizasaun.

Sekretáriu Estadu Kooperativa, Elizário Ferreira, nota katak durante ne’e problema ne’ebé kooperativa sira hasoru maka menus kapitál, tanba ne’e parte SEKoop iha hamoin atu investe kapitál atu kooperativa sira bele jere no kontribui ba Estadu inklui komunidade sira.

“Ami sei aloka millaun $5, hein Parlamentu bele aprova sai hanesan kapitalizasaun, tanba osan ne’e investe dala ida no parte kooperativa liuhosi instituisaun bele fó ema impresta hodi bele kontribui kada tinan ba Estadu, bazeia ba totál rendimentu,” dehan Sekretariu Estadu Elizário Ferreira, hafoin enkontru ho Prezidente Kooperativa na’in-218, iha Fundasaun  Hanai Malu, Bairro Pité sábadu ne’e.

Tuir governante ne’e, bainhira investe ba kapitalizasaun kooperativa, SEKoop sei akompaña nafatin liuhosi avaliasaun iha  2021 no tinan 2022 sei haree hosi investimentu ne’e hira maka bele kobre.

“Keta halo tau kapitál ona, ema laiha fali atu impresta. Tanba ne’e, presiza haree no sei avalia,” nia akresenta.

Prioridade SEKoop seluk maka atu harii kooperativa iha postu administrativu ne’ebé maka seidauk iha.

“Atu harii kooperativa kréditu kada suku ida kooperativu produsaun mínimu rua no másimu bazeia ba poténsia suku ne’e,” Elizario Fereira informa.

Prioridade seluk maka atu harii uma ba membru kooperativa sira maibé sei haree posibilidade.

“Bele fó fatin ba sira ne’ebé laiha fatin, maibé ba membru 200 ba leten tanba ha’u labele halo uma ida ba ema na’in-sanulu hafoin Prezidente kooperativa sira maka ba hela fali,” nia esplika.

Aleinde ne’e, tinan oin SEKoop sei foka aréa forma no eduka joven sira iha kooperativa atu lori joven filafali ba kampu halo serbisu kontribui ba atividade produsaun interna.

Ikus liu, sei kapasita membru kooperativa iha área jestaun kooperativa hodi hasa’e koñesimentu iha área kooperativa.

Iha fatin hanesan, Prezidente Kooperativa Lakon Nakukun Mosu Naroman (LANAMONA), Domingas dos Santos, rekoñese daudaun ne’e kooperativa sira presiza formasaun hodi kapasita membru sira.

“Ami husu Governu fó formasaun ba ami hodi kapasita no eleva abilidade iha área kooperativa,” nia subliña.

Jerente kooperativa ne’e dehan, sei buka merkadu ba grupu kooperativa sira tanba membru LANAMONA rasik la dependente ba osan maibé liuhosi produsaun no maneira asesu ba  merkadu, tanba ne’e nia husu Governu buka merkadu ba produtu kooperativa sira.

Entertatu, kapaitál ne’ebé dadaun Kooperativa LANAMONA iha hamutuk millaun $1,5, ho membru hamutuk 1.060 iha postu administrativu Cailaco, munisípiu Bobonaro, inklui iha munisípiu Aileu, Ainaro, Ermera  no Dili no planu sei loke tan liras ba Covalima.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here