Kompozitór Múzika “Oras To’o Ona”, José Filipe Ximenes “Zeca” Smith. Imajen TATOLI/Joanico de Araújo.

DILI, 29 agostu 2020 (TATOLI)–Kompozitór Múzika “Oras To’o Ona”, José Filipe Ximenes “Zeca” Smith, hateten iha prosesu luta atu hetan Timor-Leste nia indepedénsia iha momentu ne’ebá luta na’in FALINTIL sira luta ho kilat hasoru inimigu no artista múzika timoroan sira liuliu Lahane Group hakotu luta ne’e ho múzika “Oras To’o Ona” ho liafuan no mensajen sira ne’ebé bele fanu povu Timor hadeer hodi hili sira-nia destinu rasik .

“Atu hateten katak momentu ne’ebá, ita-nia luta na’in FALINTIL sira luta ho kilat hodi hasoru inimigu no ami artista múzika liuliu Lahane Group hakotu luta ho liafuan liuhosi múzika “Oras To’o Ona”. Tanba ita-bele dehan katak múzika ne’e la lori forsa no la lori kro’at hasoru inimigu maibé múzika lori nia mensajen ka lia-menon fanu povu Timor no bele muda ema-nia hanoin hodi hili sira-nia destinu rasik,” dehan dehan José Filipe Ximenes “Zeca” Smith ba Ajénsia TATOLI iha ámbitu komemorasaun Loron Konsulta Popolár ba dala-21 (30 agostu 1999-30 agostu 2020) iha nia rezidénsia Lahane, Dili, kuarta ne’e (26 agostu 2020).

Tanba ne’e, nia dehan, hafoin selebra Loron Konsulta Populár ba dala-20 (2019) ne’e Governu Timor-Leste konsidera Múzik “Oras To’o Ona” ne’e sai hanesan múzika rezisténsia ka sai hanesan patrimóniu ida-ne’ebé iha pasadu kontribui ba rezisténsia.

“Estadu rekoñe buat ida ema dehan propriedade intelektual no Estadu rekoñese múzika ne’e sai hanesan múzika rezisténsia. Ha’u sente orgullu tanba ita la espera maibé ida-ne’e Estadu rekoñese tiha ona sai hanesan Aset no patrimóniu ida no mós sai hanesan múzika ida-ne’ebé kontribui ba rezistensia. Ha’u hanesan kompozitór no grupu hotu hakarak ka lakohi sente orgullu tanba uitoan ne’ebé maka ami halo ema bele temi netik ami-nia naran. Maski la barak liu maibé iha minutu ida ka rua nia laran, ami kontribui ona ba ita-nia rain Timor-Leste,” Zeca Smith hateten.

Kompozitór ne’e dehan, prosesu atu hetan Independénsia ne’e ema hotu-hotu nia kontribuisaun tantu funu na’in durante tinan 24 iha ai-laran, povu maubere-buibere, rede klandestina no mós kontribuisaun hosi artista múzika timoroan sira seluk ne’ebé durante halo múzika barak hodi kontribui ba Timor-Leste nia luta.

“Ita bele dehan katak ohin loron hotu-hotu bele sente katak ita hotu ita-nia kontribuisaun tantu maun sira funu na’in, sira iha liur, ita-nia rede klandestina no ema barak tan nia kontribuisaun, no artista múzika rezistensia grupu sira seluk nian luta. Ezemplu, múzika Lemorai, kolega sira seluk ne’ebé durante halo múzika barak kontribui ba ita-nia rezisténsia ne’e, ha’u hanoin ida- ne’e mós hola parte hotu istória,” nia dehan.

Tanba ne’e, kompozitór ne’e husu ba foinsa’e sira tenke aproveita tempu balu no halo múzika  karik oinsá hodi kontribui ba prosesu dezenvolvimentu nasaun nian. Tanba, nia dehan, prosesu luta nia hotu ona maibé luta ba defende direitu ba dezenvolvimentu no hasai povu hosi mukit ne’e maka seidauk atinji, tanba ne’e maka múzika ne’e importante atu fanu ukun-na’in sira hadeer luta povu Timor-Leste nia di’ak.

“Ha’u hanoin, iha  demokrasia nia laran ne’e, jerasaun foun sira tenke aproveita mós tempu balu halo múzika hodi kontribui ba nia-nia nasaun liuliu ba iha prosesu dezenvolvimentu. Tanba prosesu luta ba soberania, defende ba ita-nia direitu ba indepedensia ne’e hotu ona. Maibé luta ba defende direitu ba dezenvolvimentu no hasai povu hosi mukit ne’e mak seidauk atinji. Tanba ne’e maka múzika ne’e importante duni hodi bele fanu ukun-na’in sira hader hodi luta ba povu Timor-Leste nia moris di’ak,” nia dehan.

Jornalista: Cancio Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here