Vise-Ministra Turizmu Komunitária no Kulturál, Inâcia da Conceição Teixeira. Imajen/Mídia MTKI

LAUTÉM, 28 agostu 2020 (TATOLI)-Vise-Ministra Turizmu, Komunitária no Kulturál, Inâcia da Conceição Teixeira, enkoraja Lautém-oan sira atu mantein orijinalidade estrutura tradisionál hanesan uma-tradisionál atu promove turizmu kulturál.

“Karik estrutura tradisionál hatúr nafatin ninia orijinál, ita bele halo nu’udar turizmu kulturál, inklui fatin masakre Lautém sai mós fatin interesante ida atu kompleta turizmu ne’e rasik,” tenik Vise-Ministra iha ámbitu dada-lia ho komunidade Tutuala kona-ba jestaun sítiu turístiku iha Lakumorre, suku Tutuala, postu administrativu Tutuala, munisípiu Lautém, sesta ne’e.

Durante vizita ba munisípiu Lautém, nia observa uma-tradisionál sira hahú uza ekipamentu modernu hanesan ninia kakuluk taka ho kalen.

“Liga ba kultura, Lautém nia uma tradisionál koñesidu loos tanba kuaze eventu internasionál ita lori prezente uma-tradisionál ne’e mak ba, maibé triste tebes bainhira iha dalan tama Lautém ha’u haree uma-adat sira ne’e komesa tau modernu ona, halo ho kalen. Entaun kuandu liga ba turizmu kulturál malae mai vizita karik atu esplika kalen ne’e signifika saida? ha’u sente ita hatán ladi’ak,” nia akresenta.

Notísia Relevante: Polítika SEAK Ba Tinan Tolu Harii Uma-Lulik 500 iha Territóriu Tomak

Tuir governante ne’e, kuandu halo uma-tradisionál ho kalen signifika haluha ona kultura ne’ebé bei’ala sira rai hela, ho ninia valór hodi kesi umanu ba natureza.

Tanba ne’e, Vise-Ministra husu Lautém-oan sira atu organiza malu harii organizasaun ida hodi define loloos potensialidade kada suku sira iha Lautém.

“Ita hakarak promove turizmu iha Timór liuhosi istória kultura, maibé kultura komesa hamihis ona no prefere kultura modernu mak ita bele lakon patrimóniu Estadu ne’ebé importante tebes,” nia fó hanoin.

Nia dehan, ninia kompeténsia ba área turizmu komunitária no kulturál, maibé atu haree loloos uma-tradisionál atu hadi’a ne’e kompeténsia Sekretaria Estadu Arte no kultura (SEAK).

Tanba ne’e, Ministériu Turizmu, Komunitária no Kulturál (MTKK) sei koordena ho SEAK atu fó koñesementu ba lia-nain no komunidade sira atu tau importánsia rai nafatin eransa ne’ebé bei’ala sira husik, tanba ne’e hola parte ba protesaun espíritu nasaun.

Iha biban ne’e, Vise-Ministra mós enkoraja joven sira atu mantein nafatin identidade kulturál Timór no promove kultura tuir orijinalidade hosi bei’ala sira no prezerva istória Timor-Leste nian, atu nune’e bele atrai turista sira.

“Ho prezensa turista sira bele fó rendimentu ekonómiku ba komunidade lokál nia produtu,” nia subliña.

Antes ne’e, SEAK iha ona polítika ba tinan-tolu atu hadi’a hikas uma-lulik hamutuk 500 iha territóriu laran tomak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here