Prezidente Republika,Imajen/Media PR

DILI, 28 agostu 2020 (TATOLI)–Prezidente Repúblika, Francisco Guterres Lú Olo, ohin, promulga alterasaun dahuluk ba Dekretu-Lei númeru 17/2020, 30 abril, ne’ebé kria suplementu remuneratóriu ba funsionáriu, ajente no traballadór sira iha administrasaun públika iha ámbitu prevensaun no kontrolu COVID-19 durante implementasaun estadu emerjénsia.

Primeira alterasaun ba Dekretu-Lei sei aplika ba implementasaun estadu emerjénsia tutuir malu ne’ebé deklara no renovadu liuhusi Dekretu Prezidente Repúblika númeru 29/2020, 27 marsu, 32/2020, 27 abril no 35/2020, 27 maiu.

Iha Dekretu-Lei dahuluk, 30 abril, temi kategoria traballadóre sira ne’ebé hala’o atividade profisionál ba serbisu prevensaun no kontrolu COVID-19, maibé la temi pesoál sira ne’ebé ezerse funsaun iha sala situasaun iha Centro Integrado de Gestão de Crise, ne’ebé harii ho artigu 29 husi Lei númeru 2/2010, 21 abril, Lei Seguransa Nasionál, ikus mai funsiona hanesan sala situasaun tuir Diploma Ministerial númeru 14/2020, 31 marsu.

Centro Integrado de Gestão de Crise mak responsabiliza koordenasaun resposta nasionál ba pandemia COVID-19, nomeadamente organiza sentru izolamentu no transporte ema hirak ne’ebé sai sujeitu ba izolamentu obrigatóriu no individu sira ne’ebé suspeitu infetadu ho COVID-19, liuhosi serbisu iha sala situasaun.

Iha primeira alterasaun Dekretu-Lei ne’e kategoria traballadóres ne’ebé temi mak Serviço Nacional de Inteligência ne’ebé envolve iha operasaoins oin-oin ba prevensaun no kontrolu COVID-19 no traballadores primeira liña ne’ebé serbisu iha task force, iha munisípius no Região Administrativa Especial de Oe-Cusse Ambeno, hodi implementa medidas prevensaun no kontrolu COVID-19 iha nível lokál.

Traballadores seluk ne’ebé elijivel atu hetan suplementu remuneratóriu tanba prestasaun atividade profisionál  iha servisu ba prevensaun no kontrolu COVID-19 mak: médiku ne’ebé hala’o atividade iha sentru izolamentu, hala’o prevensaun no kuidadu saúde ba pasiente ho COVID-19; enfermeira iha postu fronteira no sentru izolamentu, ema sira ne’ebé tulun asaun médika iha postus fronteira, sentru izolamentu; tékniku análize laboratóriu; tékniku saúde públika ne’ebé hala’o knaar iha postu fronteira, tékniku radiolojia ne’ebé envolve iha atividade diagnóstika COVID-19; militár Forsa Armada  no ajente PNTL ne’ebé envolve iha operasaun ba prevensaun no kontrolu COVID-19.

Aleinde ne’e, pesoál Ajénsia Investigasaun no Fiskalizasaun Atividade Ekonómika, Sanitária no Alimentar, pesoál Diresaun Nasional Quarentena no Bioseguransa husi Serviços de Migração no Autoridade Aduaneira ne’ebé hala’o funsaun iha aeroportu, portu no postu fronteira, pesoál servisu protesaun sivíl, inklui bombeiro;  pesoál Direção Nacional de Segurança e Protecção do Património Público, ne’ebé envolve iha risku ba infesaun COVID-19; pesoál hosi servisu autoridade ka administrasoins munisipais ne’ebé responsabiliza atu rekolla, transporte no dispozisaun lixu sólidu iha área urbana; pesoál ne’ebé hala’o serbisu iha autoridade no administrasaun munisipal responsavel ba orden públika no jestaun merkadu.

Komunikadu Imprensa

HAKEREK NO HATÁN

Please enter your comment!
Please enter your name here