Prezidente Repúblika, Francisco Guterres 'Lú Olo'. Imajen Tatoli/António Gonçalves

DILI, 28 agostu 2020 (TATOLI)—Prezidente Repúblika, Francisco Guterres “Lú Olo”, hateten maske hetan apoia solidariedade hosi komunidade internasionál maibé timoroan konsege manan Indonézia iha 30 agostu 1999 ho timoroan sira-nia kbiit rasik.

Prezidente Repúblika hatutan, referendu 1999 ne’ebé organiza hosi Nasaun Unida mak fó dalan ba tama iha Nasaun Unida nu’udar nasaun ho direitu hanesan ho nasaun sira seluk.

Nune’e  mós Timoroan sira luta libertasaun nasional iha 1974 ho apoia metin hosi belun sira iha eis-kolónia Portugal nian iha Áfrika, belun sira iha Austrália,  Ázia, Europa, Amérika no Pasífiku. Neineik-neineik apoia ne’e sai boot babeibeik iha mundu tanba ita kaer metin timoroan-nia mehi ukun rasik-aan.

“Ita manán ita-nia luta, hafoin luta naruk no susar, ho ita-nia kbiit rasik. Ita organiza-an ba luta ho komponente tolu Armada, klandestina no diplomátika/ rsterna. Iha tinan rua nulu resin haat, ita hatene organiza-aan, ita hatudu ita-nia kbiit, ita hatudu ita-nia determinasaun ho lia fuan murak “mate ka moris ukun rasik-an,” dehan PR Lú Olo liuhosi mensajen ba loron Konsulta Populár ba dala-21 (30 agostu 1999-30 agostu 2020), iha Palásiu Prezidensiál Nicolau Lobato, Bairru Pité, Dili, sesta ne’e. 

Tanba ne’e. Xefe Estadu hateten, ukun rasik-aan haburas timoroan nia neon no orgullu timoroan hotu-hotu. Neon ida-ne’e  haburas no hametin Unidade Nasionál katak laiha buat ida haketak maun-bin-alin sira-nia moris iha rai doben Timor-Leste.

Hafoin hanoin kle’an kona-ba revolta sira, hosi beiala sira,  líder 74 dada ema hodi hanoin ida de’it, atu hamutuk liberta  territóriu tomak no hamriik nu’udar povu ida, nasaun ida, ho neon no hakarak rasik.

Xefe Estadu fundamenta, hametin neon no hakarak ida de’it hahú no haburas ho líder polítiku barani  sira iha 1974, hanesan Francisco Xavier do Amaral, Nicolau Lobato, Mari Alkatiri, José Ramos-Horta, Justino Mota, Francisco Borja da Costa, Vicente Sa’he, Mau Lear  no seluk- seluk tan, inklui lider-feto barani ida, Maria do Ceu Pereira/Bi Lear.

“Ita labele nega katak ho jerasaun luta lidera hosi líder sira-ne’e, mak ita hahú mobiliza no organiza-an  nu’udar povu ho Pátria ida de’it,” nia dehan.

Nune’e, nia hatutan, povu tomak hadeer ba movimentu ukun rasik-an ho ASDT/FRETILIN, hanesan ne’e mak Timoroan  sira-nia istória luta libertasaun Nasional hahú iha rai doben Timor-Leste.

Xefe Estadu haktuir, ho invazaun Indonézia sentidu povu no pátria, unidade nasionál haburas liután, tanba ne’e  FALINTIL nakfilak kedas ba liman kroat povu nian, hosi0 7 dezembru 1975, loron invazaun Indonézia.

Iha baze-de-apoiu ka zona libertada, diresaun luta FRETILIN no FALINTIL hametin liután nasionalizmu no patriotismu ba povu Timor-Leste.  Moris loron -loron nian la’o ho apoia ba malu, iha zona libertada. Maibé operasaun serku no anikilamentu, ho bombardeamentu, harahun bazes-de-apoiu hotu-hotu iha 1978.  Nicolau Lobato  mate iha kampu batalla iha 31 dezembru 1978.

Ho patriotizmu no nasionalizmu maka’as hosi bases-de-apoiu mak povu lori funu tun mai vila laran, nune’e hahú hametin no habelar Frente klandestina.

“Sobrevivente sira buka malu no liutiha tinan tolu, konsege tuur hamutuk iha Maubai, Viqueque, hodi re-organiza luta,  biar iha mate laran. Barak konsege hakaat  ba Maubai no halo Konferénsia Nasional, iha 1981, lidera hosi sobrevivente, membru Comité Central FRETILIN rua,  Komandante Xanana Gusmão no Ma’hunu,” Xefe Estadu hateten.

Hosi 1981 ba oin, mosu hanoin ho estrutura foun atu hakoak liután ita-nia ema sira atu luta hamutuk. Nune’e mosu Conselho Revolucionário da Resistência Nacional (CNRN), iha 1981,  Conselho Nacional da Resistência Maubere (CNRM), iha 1987  no Conselho Nacional da Resistência Timorense (CNRT), iha 1998.

Hafoin ita reorganiza-an iha 1981, rezisténsia iha rai-laran no iha rai-liur buka mos dalan hamutuk atu ita bele manán ukun –an.

Hosi 1982, DFSE / Delegasaun FRETILIN Servisu iha rai-li’ur, muda estratéjia no hahú halo servisu maka’as liu iha área direitu umanu ho objetivu nafatin ba ukun rasik-an.

Iha 23 marsu 1983, komandante Xanana Gusmão, nu’udar Prezidente Konsellu Revolusionariu Rezisténsia Nasional – CRRN – halo kontaktu dame ho KoronÉl Purwanto, iha Lariguto-Ossú, maibé militár Indonéziu barak la kumpre akordu dame.

Durante períodu dame militár indonéziu halo estratéjia alisiamentu ba gerrilleiru sira atu rende, sira buka deteta rede klandestina no buka konvense opiniaun públika internasionÁl ho propaganda katak sira halo ‘pembangunan” iha Timor- Leste no  dehan FALINTIL  rende ona.

Ikus mai, sira viola akordu dame, nune’e, akordu ne’e rompe e komandu FALINTIL ordena levantamentu armadu iha Krarás/Viqueque no iha fatin seluk.

Iha duni tinan 1983, líder rezisténsia Kay Rala Xanana Gusmão konsege duni hato’o Plano de Paz ba Nasaun Unidas no husu referendu atu povu mak hili rasik ninia destinu.

Iha fevereiru 1989, Bispu Dom Ximenes Belo hakerek ba Sekretáriu-Jerál Nasaun Unida no husu mós referendu ba Timor-Leste. Purtantu iha outubru 1989, Amu Papa João Paulo Segundu joão vizita Timor-Leste.

“Ita-nia joven sira, ho brani no determinasaun, halo manifestasaun hafoin misa. Mídia internasional fó-sai ba mundu katak povu Timor-Leste hakarak ukun rasik-an,” PR Lú Olo haktuir.

Xefe Estadu fó lembra, ho masakre Santa Cruz, iha 12 novembru 1991, haboot liután solidariedade internasional.

Forsa indonézia kaer dirijente tolu importante hanesan Vise-Sekretáriu Komisaun Diretiva FRETILIN, Ma’hodu, iha 23 janeiru 1992.  Iha 20 novembru   1992, forsa indonezia sira kaer mós, líder rezisténsia, Kay Rala Xanana Gusmão no kondena tuir lei indonézia nian no iha 5 abríl 1993 kaer tán líder rezisténsia, Ma’huno.

“Biar nune’e, FALINTIL iha ai-laran la rende ba Indonézia,”  mensajen PR Lú Olo iha selebrasaun konsulta populár 30 ne’ebé sei selebra iha tempu badak.

Nune’e Nino Konis Santana, Sekretáriu Komisaun Diretiva FRETILIN hamriik kedas nu’udar Chefe do Conselho Executivo da Luta hodi kumpre palavra de orden “a Luta Continua”. Ikusmai hatutan hosi  Vice-Comandante-em-Chefe FALINTIL, Taur Matan Ruak.

Iha tinan 1996, Bispu Dom Carlos Filipe Ximenes Belo no José Ramos Horta simu prémiu Nobel da Paz nu’udar rekoñesimentu hosi komunidade internasional ba sira-nia kontribuisaun ba harii paz, iha ita-nia rai doben.

Xefe Estadu mós haktuir mós estudante timoroan lori ita-nia luta ba Indonézia laran ho apoiu hosi belun indonéziu sira. Krize iha Ázia akontese no movimentu pro-demokrasia mosu iha Indonézia laran hodi hamonu rejime Suharto.

Entretantu Portugál halo negosiasaun ho Indonézia ho supervizaun Nasaun Unida iha 5 maiu 1998 no Prezidente Habibie hatán halo referendu hodi hakotu konflitu iha Timor-Leste.

Iha mensajen Xefe Estadu nian fó hanoin ba Timoroan hotu katak, iha 30 agostu 1999, ho brani no determinasaun, ita-nia povu hakaat ba fatin votasaun.

“Ema ida, votu ida!  Ita liu rihun atus tolu, iha fatin-fatin,  ita hili, liuhosi votu sekretu, lakohi autonomia ho Indonézia. Ho rezultadu referendu, mehi ukun rasik-aan sai tebes duni bainhira ita Restaura ita-nia Independénsia, iha 20 maiu 2002. Referendu ne’e mosu nu’udar rezultadu hosi ita-nia luta rasik atu hatuur Timor-Leste nu’udar nasaun livre no independente,” nia esplika. 

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here