Vise-Ministru Turizmu, Komérsiu no Indústria, Domingos Lopes Antunes no Vise-Ministra Turizmu Komunitária no Kulturál, Inâcia da Conceição Teixeira, hamutuk ho Diresaun Jerál Turizmu no autoridade lokál, halo diálogu ho komunidade Tutuala kona-ba área poténsiál Turizmu. Imajen/Mídia MTKI

LAUTÉM, 28 agostu 2020 (TATOLI)-Governu liuhosi Vise-Ministru Turizmu, Komérsiu no Indústria (MTKI), Domingos Lopes Antunes no Vise-Ministra Turizmu Komunitária no Kulturál (MTKK), Inâcia da Conceição Teixeira, dada-lia ho komunidade suku Tutuala, postu administrativu Tutuala, munisípiu Lautém, kona-ba potensialidade turizmu iha suku ne’e.

Iha dada-lia ne’e, Vise-Ministru Domingos Lopes, fó sujestaun ba komunidade sira atu kria kooperativa multisetorál tanba nia nota katak Tutuala iha área pontensiál barak tebes no haree katak liuhosi kooperativa bele kria postu serbisu ba inan-aman no joven sira.

“Ha’u sujere di’ak liu iha Tutuala iha kooperativa boot ida de’it, ne’ebé hanaran kooperativa multisetorál, seksaun maka haree ba peska, ortikultura, pekuária, no seluk tan, fahe ba seksaun tuir setór sira maibé organizasaun ida de’it. Nune’e mós seksaun ida ba kréditu, nune’e membru sira bele realiza atividade negósiu no empresta fali osan ne’ebé iha ona,” tenik Vise- Ministru iha ámbitu dada-lia entre Governu ho komunidade Tutuala, sesta ne’e.

Vise-Ministru Turizmu, Komérsiu no Indústria, Domingos Lopes Antunes. Imajen/Mídia MTKI

Atu kompleta indústria turizmu, tuir governante ne’e turizmu la la’o mesak maibé presiza kompleta setór seluk hanesan agrikultura, ortikultura, perka, pekuária no seluk tan.

“Buat balun la’o ona, maibé ha’u hakarak imi (komunidade) kontinua halo produsaun ba setór sira, tanba ho ida-ne’e maka ita bele kompleta inisiativa turizmu komunitária no komérsiu, ne’ebé transforma hosi rekursu agrikultura, ortikultura no área produtivu seluk,” nia akresenta.

Vise-Ministru ne’e fó ezemplu, modo sira dalabarak kontribui ba kompetividade turizmu, tanba bainhira prodús barak maka folin la karun, tanba ne’e maka komunidade sira tenke organiza-an iha kooperativa tanba iha unidade ne’ebé eziste ona no kultura Lautém forte tebes atu serbisu hamutuk.

“Kooperativa ha’u hanoin la’ós buat foun ba imi, ha’u rona iha kooperativa ida ka rua eziste iha ne’e (Tutuala) hanesan peska iha Valusere. Inisiativa di’ak, maibé sujestaun ba imi, presiza hametin liután unidade,” nia dehan.

Governante ne’e fó hanoin, atu jere turizmu, presiza haree ba kooperativa no emprezáriu ho inisiativa rasik.

“Kooperativa di’ak tanba iha osan rasik, tanba membru sira iha partisipasaun ekonómiku no bele hetan kapitalizasaun hosi Governu liuhosi kréditu bainhira ita organiza-an di’ak liu,” nia esplika.

Vise-Ministru ne’e subliña, bainhira harii ona kooperativa multisetorál, Governu prontu tau osan hodi komunidade sira bele empresta, tanba antes ne’e Governu fó kapitál tuir proposta, maibé haree kuandu fó de’it laiha sustentabilidade mak Governu liuhosi Sekretaria Estadu Kooperativa (SEKoop) inklui liña ministériu bele fó formasaun hodi kapasita di’ak liután komunidade hodi jere kooperativa rasik.

Iha biban hanesan, Vise-Ministra Komunitária no Kulturál, Inâcia da Conceição Teixeira, reforsa bainhira komunidade sai benefisiáriu turizmu komunitária ho jestaun di’ak bele rezolve buat hotu, tanba ne’e tenke hatúr iha organizasaun nia-laran liuhosi kooperativa boot ida atu ema idaidak hatene ninia papél.

Vise-Ministra Turizmu Komunitária no Kulturál, Inâcia da Conceição Teixeira. Imajen/Mídia MTKI

“Ha’u fó ezemplu ida, bainhira iha suku rua ka tolu dalaruma mosu konflitu ba malu, razaun simples de’it tanba suku ida maka hetan benefísiu no seluk laiha, maibé kuandu planu didi’ak turizmu, kada suku idaidak bele fahe atividade no halo atividade tuir planu suku atubele kompleta malu halo pakote ida bainhira ema mai vizita Tutuala.

Governante ne’e haktuir, bainhira dada-lia ho emprezariu balun, sira dehan Tutuala potensiál iha tasi no turizmu.

“Maibé hafoin ha’u haree, ha’u hanoin la loos tanba Lautém riku tebes ho rekursu natureza ne’ebé Maromak fó, maibé presiza matenek sira atu transforma didi’ak área potensiál hodi kria postu serbisu ba joven no inan-aman sira,” subliña Vise-Ministra.

Dadaun ne’e, suku Tutuala iha ona kooperativa ne’ebé harii hosi komunidade sira no mós hosi individuál ka emprezáriu Tutuala-oan rasik ne’ebé lokaliza Valusere, Tutuala.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here