formasaun ho tema "Matadalan Mediasaun Sensivél Jéneru" ne'e ba mediadór sira hosi munisípiu 12 inklui Rejiaun Administrativa Espesiál Oé-Cusse Ambeno (RAEOA). Imajen TATOLI/Osória Marques.

DILI, 26 agostu 2020 (TATOLI)–Diretór Jerál Sekretáriu Estadu Protesaun Sivíl (SEPS), Superitendente Ismael da Costa Babo, hateten formasaun ba mediadór Diresaun Nasionál Protesaun Konflitu Komunitária (DNPKK) ho objetivu atu eleva kapasidade no konesementu ne’ebé mak klean liután ba mediadór sira bainhira enfrenta konflitu ruma iha ita-nia komunidade sira

Nia hatutan, formasaun ho tema “Matadalan Mediasaun Sensivél Jéneru” ne’e ba mediadór sira hosi munisípiu 12 inklui Rejiaun Administrativa Espesiál Oé-Cusse Ambeno (RAEOA). 

“Formasaun ida-ne’e ami oferese ba ami-nia mediadór iha munisípiu 12 inklui ho RAEOA ho objetivu atu eleva kapasidade no konesementu ne’ebé mak klean liután ba ami-nia mediadór sira bainhira enfrenta konflitu ruma iha ita-nia komunidade sira,” dehan Diretór Jerál Sekretáriu Estadu Protesaun Sivíl (SEPS), Ismael da Costa Babo, ba jornalista sira iha salaun João Paulo II Comoro, Dili, kuarta ne’e.

Diretór jerál ne’e haktuir, kapasidade mak prioridade importante ba nesesidade báziku ne’ebé sira bele halo mediasaun no mós halo prevenesaun konflitu komunitária.

Tanba, nia dehan, sira mak sai hanesan ajente protesaun sivíl para halo mapamentu ba risku akontesementu konflitu para bele hatene área ida-ne’ebé mak iha konflitu nune’e bele tama ho prevensaun. 

Nia hateten, nia parte kontinua xama atensaun ba mediadór sira katak tenke tama ho independente no neutrál iha kualker situasaun ba problema ruma iha terenu.

“Mediasaun ne’ebé mak  mediadór hala’o ne’e labele promove sira-nia aan hanesan kór partidu, arte marsiais no familiarizmu maibé sai hanesan matadalan ida ba nia populasaun iha fatin konflitu,” nia dehan.

Tuir nia, mediadór ba kada munisípiu iha ema na’in-haat (4) mak partisipa ba formasaun ne’e no matéria bazikamente ba sira mak oinsa iha kapasidade atu halo mediasaun no halo aprosimasaun ba populasaun sira iha terenu inklui oinsa foti solusaun ba problema ne’e.

Mediadór DNPKK Viqueque, Justino Sarmento. Imajen TATOLI/Osória Marques.

Entretantu, Mediadór DNPKK Viqueque, Justino Sarmento hatete  formasaun ‘matadalan mediasaun sensivél jéneru’ ne’e hanesan matéria bázika ba mediadór hotu iha munisípiu 12 inklui RAEOA atu bele hala’o tuir hodi oinsa mak bele halo mediasaun ba prevensaun konflitu ruma iha komunidade

Tanba, nia dehan, asaun prevensaun ne’e importante tebes ba entidade hotu-hotu atu nune’e servisu hotu la’o di’ak hodi komunidade moris hakmatek no nasaun bele avansa ba oin.

“Ha’u prontu sai mediadór ba prevensaun konflitu iha populasaun nia leet maibé ami sempre hamutuk ho autoridade kompetente sira hodi halo asaun ba prevensaun konflitu iha terenu,” dehan mediadór ne’e.

Nia dehan, formsaun loron tolu ba mediadór sira ne’e sufusiénte ona tanba formasaun hirak ne’e faze pur faze no sei iha nia kontinuasaun ba futuru no fiar katak servisu hamutuk UN Woman sei iha formasaun kontinuasaun.

Formasaun ne’e realiza tanba hetan suporta no servisu hamutuk ho UN Woman ho Organizasaun Nasaun Unida ba Direitu Umanu no hala’o durante loron tolu hahu hosi loron 12-28 agostu ne’e. 

Jornalista: Osória Marques

Editór: Cancio Xiemenes

HAKEREK NO HATÁN

Please enter your comment!
Please enter your name here