Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 26 agostu 2020 (TATOLI)-Ministériu Obra Públika (MOP) hahú estabelese komisaun instaladora hodi halo tranzisaun no preparativu ba estrutura Eletrisidade de Timor-Leste (EDTL).

Prosesu ne’e hahú hafoin Prezidente Repúblika, Francisco Guterres ‘Lú Olo’, promulga dekretu-lei kona-ba transforma EDTL hosi diresaun jerál ba empreza públika (ho abreviasaun EDTL,EP).

“Ami estabelese ona komisaun instaladora tanba públika ona iha Jornal da Repúblika, ne’ebé ita hein de’it sira halo atividade atu prepara EDTL tama hanesan empreza públiku ofisiálmente iha 1 janeiru 2021,” tenik Ministru Obra Públiku, Salvador Eugênio Soares dos Reis Pires, iha Palásiu Governu, kuarta ne’e.

Estabelesimentu komisaun instaladora tuir despaisu hosi Ministru Salvador, ho númeru  1687/MOP/VIII/2020 ho baze ba publikasaun dekreto-lei  29/2020, 22 jullu ba nomeasaun membru komisaun instaladora EDTL,EP

Governante ne’e dehan, komisaun ne’e sei halo preparativu importante sira hanesan estabelese estrutura empreza públika ne’e rasik tuir dekretu-lei, rekrutamentu tékniku ka funsionáriu no transferénsia funsionáriu públiku sira ba iha EDTL,EP, inklui hahú halo planu orsamentál molok diskusaun Orsamentu Jerál Estadu (OJE) 2021.

Ho nune’e, liuhosi despaisu maka nomeia ona, José  Marcelino Cabral  Belo nu’udar koordenadór  ba  komisaun  ne’ebé indika husi Gabinete MOP, Carmeneza dos Santos Monteiro nu’udar komisária Komisaun Funsaun  Públika (KFP), ne’ebé nomea rasik hosi Presidente KFP liuhosi  ofísiu no númeru 408/2020, KFP 12 agosto 2020 hanesan membru komisaun no Diretór Jerál Diresaun  Jerál Administrasaun no Finansa hosi Ministériu Finansa (MF),  Patricio Barbosa, (membro komisaun) inklui  Latino Jerónimo.

Komisaun instaladora konstitui hosi Gabinete Ministru nian, EDTL ida, reprezentante hosi KFP ida no MF ida atu prepara períodu tranzisaun tuir lei EDTL.

“Sira halo preparasaun orsamentu, estrutura rekursu umanu, hafoin transferénsia ita-nia staff sira, prosesu rekrutamentu hosi rekursu umanu, no estabelesimentu re-eskritóriu ne’e rasik, nesesidade lojístika, no buat sira seluk komisaun instaladora sei prepara,” nia akresenta.

Importante envolvimentu KFP tanba atu sosializa ba lala’ok no transferénsia funsionáriu EDTL 500 resin, ne’ebé sei hili opsaun mantein sai funsionáriu públiku ka tuir estatutu empreza públika.

Atribuisaun EDTL, EP mak apoiu Governu ba definisaun polítika rekursu enerjétiku, halo planu eletrifikasaun nasionál, promove uza efisiente enerjia elétrika, asegura fornesimentu enerjia elétrika ba konsumu, kualidade fornesiementu.

Alende ne’e, hadi’ak sistema integradu automatizasaun no komunikasaun, medida ba kontrolu, inspesaun ba eliminasaun konesaun ilegál, ezerse atividade importansaun no esportasaun enerjia elétrika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here